РУСКИ КЕРЕСТУР – Прешлого тижня на членство у Одборе за културу у Националним совиту Руснацох задзековал Иван Канюх зоз Нового Саду. Його задзекованє затераз перше и єдине у тим Одборе. Без нього Одбор тераз чишлї осем членох.
Скорей нього задзековали шесцеро у Одборе за образованє, и седма членїца розришена функциї предсидательки, та тераз єст лєм два членїци, т.є. нова предсидателька и єдна членїца, цо нє достаточне за кворум и дальшу роботу.
Задзековала и єдна членїца Одбору за службене хаснованє язика и писма, дзе остало шейсц члени, цо достаточне число за одлучованє.
Потим, задзековали и двойо зоз седем членох Одбору за информованє, дзе минималне число пейц, цо достаточне за одлучованє.
Перше загашене и Роботне цело за науку, дзе задзековали штверо зоз шесцерих членох, а задзековали и тройо од дзевецерих членох зоз Роботного цела за младих.
Сумируюци потерашнї случованя у одборох и роботних целох, потераз вкупно призначени 16 задзекованя и єдно розришенє.
По Статуту НСР, штири одбори – за образованє, културу, информованє и службене хаснованє язика и писма обовязни, и муша мац найменєй пейсц, а найвецей дзевец членох, док роботни цела нєобовязни, и Совит може функционовац без нїх.
The post Перше задзекованє у Одборе за културу first appeared on Руске слово.