БАЧКА ТОПОЛЯ – Представителє рускей заєднїци, 8. мая мали схадзку зоз представителями Општини Бачка Тополя на чолє з предсидательом Адрияном Сатмарийом, на тему централней преслави Националного швета Руснацох, котре будзе отримане 17. януара 2026. року у Новим Орахове.
У нашей делеґациї на схадзки були спред Заводу за културу войводянских Руснацох директор Сашо Сабадош и Валентина Колошняї, предсидатель Вивершного одбору Националного совиту Руснацох (НСР) Славиша Сабадош и член НСР Желько Ковач, як и предсидателька КУД „Петро Кузмяк” з Нового Орахова Татяна Дудаш.
На схадзки предсидательови Сатмарийови придате урядове обвисценє же ше преслава Националного швета отрима у тим месце, утвердзени и датум, бешедоване и о способох на хтори Општина Бачка Тополя годна помогнуц, а то будзе и реализованє коктелу после шветочней академиї, а предкладанє Новоораховчанох же би коктел бул отримани у Тополї у наменским просторе.
Бешедовало ше и о динамики самих програмох у рамикох централней преслави, а порадзене и же перша схадзка Орґанизацийного одбору будзе отримана 11. юния у Новим Орахове.
The post Порада о централней преслави Националного швета first appeared on Руске слово.