ЗОМБОР – Виборна настава руского язика и язичней култури з елементами националней култури у основних школох у Суботици, мала би почац од октобра, як догварене вчера, 6. септембра на схадзки представительох Националного совиту Руснацох у Школскей управи Зомбор (ШУЗ).
Началнїца ШУЗ Милана Минарски прияла нашу делеґацию у котрей були предсидателька Одбору за образованє Националного совиту Руснацох Олена Папуґа, предсидатель Националного совиту Руснацох Йоаким Рац, предсидатель Вивершного одбору Желько Ковач.
Вони ю поинформовали о предходней нащиви ОШ „Иван Ґоран Ковачич” у Суботици, та порадзене же би директоре у тей и других суботицких школох дзе єст приявених школярох за руски язик поробели анкету, цо им була законска обовязка ище у априлу.
Наша делеґация пре тото препущенє директорох, пойдзе и до локалней самоуправи городу Суботица же би обезпечела плацу за учительку Маю Джумич котра будзе викладац руски язик, а настава би так могла поряднє почац од октобра.
The post Виборна настава у Суботици од октобра first appeared on Руске слово.