НОВИ САД – У Заводу за културу войводянских Руснацох у Новим Саду, вовторок, 13. фебруара отримана 5. схадзка Одбору за образованє Националного совиту Руснацох.
На схадзки Одбору за образованє на Дньовим шоре було дванац точки хтори ше одношели на спатранє посцигнутого у прешлим року як и предстояцих активносох и задаткох у тим року.
Як у уводним викладаню надпомла предсидателька Одбору Олена Папуґа, у прешлим року було вельо почежкосци, но дзекуюци упартей роботи членох Одбору, посцигнути задоволююци реултати.
Насампредз, после вецей акциї, схадзкох и поради, удало ше затримац оддзелєня у основних школох у Дюрдьове и Коцуре.
Концом прешлого року шветочно означени вельки ювилеї и рочнїци хтори значни за нашу заєднїцу – то 270 роки образованя, 120 роки предшколского образованя и 100 роки нашей Ґраматики. Представени були шицки школи дзе ше учи на руским язику у порядней настави и у виборней настави. У пригодней програми хтору пририхтали учительки участвовали и школяре тих школох, а присутни були директоре школох, представителє локалней самоуправи, як и числени други госци.
Кед слово о предстояцих активносцох, найважнєйши ше одноша на упис до оводох, до першей класи основних школох, як и до Ґимназиї у Руским Керестуре.
Як заключене на схадзки обовязки остали исти, у тим напряме уж од початку идуцого тижня будзе ше контактовац компетентних у локалних самоуправох, а потим буду отримани и схадзки на тему ришованя почежкосцох коло упису и орґанизованю настави на руским язику.
Як и прешлого року найвецей проблеми єст кед слово о упису до оводох у Дюрдьове и Коцуре. Упис до першей класи основней школи дакус субтилнєйши и треба буц упарти у бешеди зоз родичами. Активносци коло упису до штреднєй школи, односно до Ґимназиї у Руским Керестуре уж почали. Роботна ґрупа хтора оформена у школи уж почала одредзени акциї. Очекує ше же буду орґанизовани и екскурзиї школярох зоз других местох же би нащивели Ґимназию и наживо ше доисцели о позитивних бокох школованя у Риским Керестуре.
Виборна настава за тераз одлично функционує у Новим Саду. Учителька Анамария Рац на схадзки надпомла же того року перши раз ма полни фонд годзинох. Преподава ше у осменац школох на териториї Нового Саду, а велї школяре по законченю основней школи жадаю предлужиц учиц руски язик и у штреднєй школи.
Визначене же ище вше вельки проблем коло видаваня наших учебнїкох. Будзе ше вимагац и глєдац помоц од висших инстанцох и у компетентних министерствох.
За тераз остало ришиц образованє на мацеринскей бешеди у Суботици и то будзе єдна з перших активносцох Одбору за образованє. Интересованя єст, а тиж так нє проблем анї учительки.
За школярох и того лєта, од 8. лєбо од 22. юлия, будзе орґанизована лєтна школа у Попраду (Словацка), а як поведзене школяре нїзших класох нащивя нашо места, а старши, штредньошколци, буд мац екскурзию до Земплинских Теплицох у Словацкей початком мая.
Планує ше ознова орґанизовац стретнуца руских школох и уж розпочати догварки зоз школу у Републики Горватскей.
За тот рок Одбор поставел себе задаток орґанизовац пригодну манифестацию, програму, на чесц и здогадованє на Сенку Бенчик.
Як и прешлого року буду отримани и змаганя школярох у знаню мацеринскей бешеди, а того року буду у Руским Керестуре.
The post Обовязки и задатки исти як и прешлого року first appeared on Руске слово.