КОЦУР – У просторийох Подручней канцелариї Националного совиту Руснацох у Коцуре всоботу, 11. новембра, отримана перша з трох планованих роботньох наволана „Жатвово єшеньски роботнї”.
У сотруднїцтве зоз Активом женох КУД „Жатва”, на тей роботнї, як и на наступних, годно видзиц и научиц велї интересантносци о живоце и роботи з прешлосци. Окрем того, учашнїки ше на роботнї тей соботи, як и наиходзацих викендох, годни и сами опробовац у даєдних активносцох як цо штриканє, вишиванє и отримованє наших руских сукньох.
![](https://www.ruskeslovo.com/wp-content/uploads/2023/11/08-2023-11-11-KOC-Zatvovo-jesenjski-robotnji-ORU-11-large.jpg)
По словох предсидательки КУД „Жатва” Меланиї Мали, одлучели ше на першей роботнї шицких нащивительох упознац зоз схопносцу штриканя и та членом фолклорней секциї виштрикали шуфи. Шлїдуюцого викенду плановане учиц вишивац, а за треци викенд задумане же би ше представело як ше отримує нашо народне облєчиво, як ше покрохмалєни сукнї розпейґлує и як ше о тим водзи рахунку.
![](https://www.ruskeslovo.com/wp-content/uploads/2023/11/08-2023-11-11-KOC-Zatvovo-jesenjski-robotnji-ORU-7-1-large.jpg)
![](https://www.ruskeslovo.com/wp-content/uploads/2023/11/08-2023-11-11-KOC-Zatvovo-jesenjski-robotnji-ORU-10-large.jpg)
Понеже на роботнї було барз крашнє, додала Малийова, учашнїки достали поволанку од Активу женох же би им ше каждей стреди придружели на їх традицийних друженьох у коцурскей Библиотеки и там вєдно з нїма штрикали, вишивали, або робели други даяки ручни роботнї. Жени зоз Активу ше раз тижньово сходза, а велї ручни роботи котри законча праве на таких друженьох роками прикрашую їх познати етно столи.
![](https://www.ruskeslovo.com/wp-content/uploads/2023/11/08-2023-11-11-KOC-Zatvovo-jesenjski-robotnji-ORU-8-large.jpg)
![](https://www.ruskeslovo.com/wp-content/uploads/2023/11/08-2023-11-11-KOC-Zatvovo-jesenjski-robotnji-ORU-13-large.jpg)
По словох Малийовей, проєкт идея младежи Дружтва котри вона як предсидателька дзечнє потримала, понеже циль шицкого бул же би ше през жиму, кед ше законча манифестациї и наступи, запровадзовало друженя. Роботнї наменєни як младим, так и старшим заинтерсованим, шицким котри жадаю научиц и усовершиц спомнути схопносци.
Шлїдуюца роботня заказана на соботу, 18. новембра, з початком на 10 годзин.
Проєкт потримало Роботне цело за младих Националного совиту Руснацох.
![](https://www.ruskeslovo.com/wp-content/uploads/2023/11/08-2023-11-11-KOC-Zatvovo-jesenjski-robotnji-ORU-1-large.jpg)
The post Успишно отримана перша „Жатвовa єшеньскa роботня” (фото) first appeared on Руске слово.