ВЕРБАС/КОЦУР – У просторийох Културно-просвитного дружтва „Карпати”, дзе ше находзи и Подручна канцелария Националного совиту Руснацох у Вербаше пондзелок вечар, 23. октобра, отримана схадзка на котрей представени нови правилнїк о дальшим функционованю тей канцелариї.
Схадзки присуствовали предсидатель НСР Йоаким Рац, предсидатель Вивершного одбору НСР Желько Ковач и секретар НСР Таня Арва Планчак, як и координатор Подручней канцелариї у Вербаше др Деян Загорянски, предсидатель КПД „Карпати” Микола Папуґа и други члени того Дружтва. Присутним представени нови правилнїк о котрим бешедовал Рац, а др. Загорянски шицких поинформовал о потерашнєй роботи и активносцох, як и о рижних ситуацийох и проблемох з котрима ше зочую.
По словох предсидателя НСР Йоакима Раца, по прилапйованю нового правилнїка о Подручних канцеларийох, ришене же би екипа НСР обишла шицки канцелариї по наших местох. Скорей Вербасу обишли Коцур, и як визначене, у обидвох местох бешедоване о тим же як и на яки способ би у пракси випатрало тото финансованє по новим правилнїку. Того тижня ище ше планує обисц Срим, пойсц до Сримскей Митровици, до Шиду. Потим и други канцелариї, Нови Сад, Дюрдьов, Нове Орахово и Суботицу, и як визначел Рац, практично би вец зоз тим заокружели бешеди на тему нового правилнїка.
По словох координатора Подручней канцелариї НСР у Вербаше др Деяна Загорянского, то єдна з найстарших канцеларийох котра снована на початку дїялносци Националного совиту и першого правилнїка, и цали тот час урядово функционовала и свою мисию сполньовала. Як визначел, кед слово о роботи и секцийох, як Дружтво виполнюю векшину тих критериюмох, а потераз участвовали на шицки манифестациї котри од окремного значеня за руску националну меншину, и то им барз важне. У рамикох Дружтва уключена и українска национална меншина, а наступаю и на їх манифестацийох зоз програму котра прилагодзена их змисту.
Спомнути представителє НСР, на чолє зоз його предсидательом Йоакимом Рацом, нащивели и Подручну канцеларию НСР у Коцуре и вєдно зоз єй координатором Меланию Мали бешедовали о новим правилнїку. Як гварела Малийова з тей нагоди, одлучене же би кажди пияток, у периодзе од 9 по 11 годзин предполадньом, Подручна канцелария у Коцуре мала роботни час, же би шицки заинтересовани теди могли присц до тих просторийох и поинформовац ше у вязи шицкого цо вязане за руску заєднїцу.
На остатнєй отриманей схадзки Националного совиту Руснацох прилапени нови правилнїк о Подручних канцеларийох НСР по котрим ше ушорює робота тих канцеларийох, финансованє, алє и обовязки. Же би ше компетентним и другим котри по наших местох хасную тоти просториї приблїжело тот правилнїк, представителє Националного совиту Руснацох нащивя шицки Подручни канцелариї.
The post Представени нови правилнїк о Подручних канцеларийох first appeared on Руске слово.