НОВИ САД – Пририхтованя за наиходзацу схадзку Националного совиту Руснацох, котра будзе отримана 8. априла у Руским Керестуре, формално закончени на вчерайшей схадзки його Вивершного одбору.
Схадзку водзел предсидатель ВО Славиша Сабадош, а присутни члени – Наташа Макаї Мудрох и Микола Кухар, дебатовали о обсяжним дньовим шоре.
Окрем звичайних точкох як цо прилапйованє записнїкох и информованє о активносцох медзи двома схадзками, предложени члени до двох роботних целох – за младих и науку.
Звит о роботи на схадзки НС Руснацох поднєшу донєдавни предсидатель Совиту Йоаким Рац и терашнї предсидатель Стеван Самочета, а Звит о роботи ВО обгрунтує Славиша Сабадош. Попри тим, на схадзки ше будзе гласац и о їх планох роботи и Финансийним плану за 2026. рок. Одбори тиж написали свойо звити о роботи за прешли рок.
Звити о роботи и финансийни звити поднєшу и директоре Руского народного театру „Петро Ризнич Дядя” и НВУ „Руске слово” Славко Орос и др Борис Варґа, чий снователь Национални совит Руснацох. Вони на вчерайшей схадзки и усмено обгрунтовали звити и плани о роботи за тот рок.
На вчерайшей схадзки, медзи другима точками, гласало ше и о проєктох котри на адресу Совиту сцигли пред самим початком схадзки. Роби ше о конкурсох на котри ше нашо здруженя приявели з рижнима проєктами, а очекує ше же шицки проєкти достаню потримовку НС на самей схадзки.
На схадзки, пре оправдани причини, нє присуствовал предсидатель НС Стеван Самочета и члени Нада Хромиш Аничич и Владимир Олеяр.
The post Будзе обсяжни дньови шор first appeared on Руске слово.