НОВИ САД – У Заводзе за културу войводянских Руснацох, штварток, 27. марца, отримана схадзка Одбору за образованє при Националному совиту Руснацох (НСР), на хторей ше бешедовало о можлївосци отвераня цалодньовей мишаней ґрупи руских дзецох предшколского возросту од 3 по 6 роки у даєдней з новосадских предшколских установох (ПУ).
На схадзки були предсидатель НСР Йоаким Рац, предсидателька Одбору за образованє Олена Папуґа, предсидатель Вивершного одбору НСР Славиша Сабадош, як и родичи наймладших дзецох у Новим Садзе.
Родичи були заинтересовани и конструктивни на тоту тему, а же би Одбор могол превжац перши крочаї, на схадзки порадзене же пошвидко буду направени Упитнїки у хторих ше родичи годни вияшнїц же сцу же би им дзеци ходзели до рускей воспитней ґрупи од 3 по 6 роки. Упитнїки найвироятнєйше буду онлайн, а родичом маю буц предложени и евентуални обєкти ПУ за хтори би були заинтересовани.
Папуґова окреме апеловала на тих родичох хтори першираз уписую свойо дзеци до дзецинскей заградки прейґ еУправи, (упис од априла), же би заокружели руски язик. Наглашела же то нє значи же тоти дзеци, кед ше потамаль нє оформи руску ґрупу, нє буду уписани до сербскей ґрупи.
Кед ше укаже же будзе досц заинтересованих, шлїдуюци крочай будзе порада з городскима власцами, односно Управу ПУ, дзе ше им предочи спомнуту инициятиву. На схадзки дотхнути и велї други питаня о хторих ше барз швидко будзе мушиц бешедовац и радзиц, окреме цо з дзецми хтори уж уписани до оводи, до сербскей ґрупи, а сцели би ходзиц до рускей кед би була оформена.
У случаю же за тоту инициятиву нє будзе слуха з боку предпоставених, Папуґова спомла и евентуалне факултативне ученє руского язика за наймладших, два раз до мешаца.
По словох предсидателя Раца, НСР на тим будзе упарти и витирвали, здогадуюци же актаулному Совиту на початку мандата, та и тераз, образованє по руски на першим месце.
The post Инициятива за цалодньову ґрупу руских дзецох у предшколскей установи first appeared on Руске слово.