БЕОҐРАД – Представнїки Националного совиту Руснацох, предсидатель Йоаким Рац и предсидателька Одбору за образованє Олена Папуґа участвовали на схадзки на тему Образованя националних меншинох у Сербиї котра була отримана у Палати Сербиї з представнїками Министерства образованя и представнїками других националних совитох.
Схадзку орґанизовало Министерство образованя, присуствовала ресорна министерка Славица Дюкич Деянович, державна секретарка Анико Єрас, о.д. помоцнїка министра за унапредзенє людских и меншинских правох у образованю Нермин Балия, помоцнїк министра за превенцию и защиту од насилства и инклузию чувствительних ґрупох у образованю доц. др Снежана Вукович, як и представителє других националних совитох, и други представнїки Министарства просвити компетентни за тоту обласц.
По аґенди дискутовало ше о националней читанки за 3. и 4. класу основней школи, о стандардох школярских посцигнуцох за конєц обовязного образованя, як и о друкованю нїзкотиражних учебнїкох за наиходзаци школски рок 2025/26. школски рок.
Министерка Дюкич Деянович визначела же образованє єдно зоз основних людских правох, и же Устав Сербиї ґарантує на образованє каждей особи. Медзи иншим же Министерство образованя припаднїком националних меншинох оможлївює образованє по трох моделох – на мацеринским язику, на сербским язику зоз виучованьом мацеринского язика зоз елементами националней култури, алє и двоязично.
Осем национални меншини ше образую на мацеринским язику, 16 национални меншини ше образую на сербским язику, а мацерински язик уча як виборну програму, док ше лєм болгарска национална меншина опредзелєла за двоязичне образованє, дзепоєдни предмети уча на болгарским, а дзепоєдни на сербским язику.
На схадзки визначене и же пре ефикаснєйшу роботу унапредзованя образованя националних меншинох формовани Сектор за унапредзенє людских и меншинских правох.
The post Представнїки Совиту на схадзки о образованю националних меншинох first appeared on Руске слово.