ВЕРБАС – У просторийох Предшколскей установи (ПУ) „Бошко Буха” у Вербаше, у централним обєкту „Бубка” стреду, 15. мая отримана схадзка представнїкох Националного совиту Руснацох и руководства спомнутей установи, на котрей главна тема було образованє дзецох по руски на предшколским возросту у Оддзелєню „Герлїчка” у Коцуре.
На схадзки присуствовал предсидатель Националного совиту Руснацох (НСР) Йоаким Рац, предсидателька Oдбору за образованє НСР Олена Папуґа, предсидатель Вивершного одбору Желько Ковач, директор ПУ „Бошко Буха” Небойша Дешич и помоцнїца директора ПУ „Бошко Буха” Дубравка Чирич Срданович.
Як за Рутенпрес гварела предсидателька Oдбору за образованє НСР Олена Папуґа на початку схадзки представнїки Националного совиту Руснацох визначели же би од септембра требало формовац руску воспитну предшколску ґрупу, же би 7 дзеци зоз ґенерациї 2018. рок могли пойсц порихтани до першей класи руского оддзелєня 2025. року.
У Оддзелєню „Герлїчка” у Коцуре єст мишана сербско-руска ґрупа котра того року ма 24 дзеци, возросту од 3 по 6 роки, и у нєй ше робота одвива на руским и сербским язику. Зоз представителями предшколскей установи зоз Вербасу насампредз бешедоване як формовац руску предшколску ґрупу. Бешедоване о цалодньовим пребуваню дзе би язик бул лєм руски, цо би Национални совит Русанцох и найволєл, алє директор Дешич визначел же нєт простору за формованє такей ґрупи.
У розгварки дати два можлївосци, а то же би руска предшколска ґрупа мала пребуванє пополадню, або же би дзеци остали у мишаней цалодньовей ґрупи, а же би окреме по два годзини дньово мали активносци пририхтованя за руске оддзелєнє у школи.
Дате же би родичи о тим одлучели и вияшнєли ше на схадзки на вовторок, 21. мая, на 18 годзин, дзе будзе заєднїцка схадзка родичох и представнїкох Одбору за образованє у просторийох „Герлїчки” у Коцуре.
The post Отримана схадзка представнїкох Националного совиту Руснацох и ПУ „Бошко Буха” first appeared on Руске слово.