НОВИ САД – Перша схадзка Роботного цела за младих у новим зволаню Националного совиту Руснацох, отримана стреду, 17. мая у просторийох Заводу за културу войводянских Руснацох (Матици сербскей 15).
Дньови шор на схадзки мал лєм три точки од хторих ше найзначнєйша одношела на розподзельованє средствох по Конкурсу за софинансованє младежских проєктох.
Предсидатель Роботного цела за младих Андрей Орос гварел же на розписани Конкурс сцигли прияви за тринац проєкти и же шицки апликанти вєдно вимагали 818.000 динари. Тота сума два раз векша як цо Цело ма средства у буджету (370.000 динари).
Скромну суму було чежко подзелїц, насампредз прето же проєкти младих заслужую увагу и потримовку. Члени Цела на тот завод потримали два проєкти у Новим Саду, три у Руским Керестуре и Коцуре, два у Дюрдьове и по єден у Шиду и Суботици. Проєкти зоз обласци култури, образованя, нєформалней едукациї и буду реализовани по конєц рока.
Зоз єдногласну одлуку єден проєкт одбити зоз обгрунтованьом же го Цело нє може финансовац прето же є по програми нєодвитуюци.
The post Розподзелєни средства по Конкурсу first appeared on Руске слово.