На правей половки герба находзи ше медведз червеней фарби, у стояцим положеню, хтори патри на лїви, гералдични бок. Спрам толкованя, медведз стародавни славянски символ хтори Руснацох вяже за їх праотечество у Карпатох. Друга половка герба подзелєна на седем горизонтални поля, на хторих ше зменюю пантлїки цмей белавей и златно-жовтей фарби.
Описани герб преноши историйну традицию Руснацох. Вон 30. марца 1920. року постал урядови герб автономней обласци Подкарпатскей Руси зоз шедзиском у Ужгородзе у составе Чехословацкей од 1919. по 1938. рок. На тим гербу пантлїки белавей фарби означую штири жупаниї: Унґ, Береґ, Уґоча и Мараморош, хтори вошли до составу спомнутей обласци, а три златно-жовти пантлїки — три златоносни рики з тей обласци: Уж, Латорица и Тиса. Комбинованє белавей и жовтей фарби вшелїяк присутне и у ознакох вецей жупанийох Закарпатскей (Подкарпатскей) обласци, а белаво-златна комбинация фарбох и ознака Рюриковичох, владарского дому Києвскей Руси, першей штредньовиковней держави Восточних Славянох, односно Русинох.
Нєшка тот герб представя общеприлапени знак векшини русинских орґанизацийох ширцом швета: у Словацкей, Ческей, Польскей, України, Мадярскей, Румуниї, Горватскей, Сербиї, Нємецкей, ЗАД, Канади и индзей. Вон препознатлїви знак и часц идентитета шицких Руснацох, без огляду на їх реґионалну припадносц и националну ориєнтацию.