Клодин Брохи зоз представнїками националних совитох о образованю

БЕОҐРАД – У просторийох Канцелариї Совиту Европи на Новим Беоґрадзе пияток, 25. януара, отримана схадзка представнїкох националних меншинох зоз Kлодин Брохи, експертом комитета за образованє зоз Стразбуру, преноши Руска редакция Радио-телевизиї Войводини.

На схадзки бешедоване о тим як Европа патри на процес образованя, а представени три главни модели образованя у даєдних державох и штредкох дзе присутни меншини.

Попри Борислава Сакача предсидателя Националного совиту (НС) Руснацох, на схадзки були присутни и Славица Байор, директорка Основней школи „Братство єдинство” зоз Коцура и Любка Малацко, наставнїца руского язика зоз Основней школи и Штреднєй школи з домом школярох „Петро Кузмяк” з Руского Керестура.

Представителє Националного совиту Мадярох, Горватох, Албанцох, Бошнякох бешедовали цо по тераз посцигнуте у образованю спомнутих националних заєднїцох и цо би ище могло зробиц на тим плану.

Предсидатель НС Руснацох Борислав Сакач виявел же на схадзки бешедоване о потерашнїх посцигнуцох, як ше применює одредзени закони и яки модели образованя заступени у нашей держави.