План роботи НС за 2016. рок

ПЛАН РОБОТИ ПРЕДСИДАТЕЛЯ НАЦИОНАЛНОГО СОВИТУ ЗА 2016. РОК
На основи члена 24 став 1 точка 4 Статута Националного совиту рускей националней меншини у обовязки сом представиц план роботи Националного совиту за 2016. рок.
Як и того 2015. року так и у 2016. року, нєобходне сотрудзовац зоз шицкима представнїками власци у Републики Сербиї (републичней, покраїнскей и локалней), Републичним националним совитом, представнїками ресорних Министерствох, Координацию националних совитох у Републики Сербиї, зоз подписнїками медзиреґионалних сотруднїцтвох (Прешовским самоуправним крайом у Словацкей и Закарпатску обласцу у України), зоз шицкима институциями и установами хторим Национални совит снователь лєбо соснователь, зоз подручнима канцелариями, културно уметнїцкима дружтвами, нєвладовим сектором и шицкима тима хтори робя на хасен нашей рускей заєднїци, цо ше у 2015. року указало як барз успишне. У 2016. року будзе потребне пошвециц увагу окремному акцийному плану за унапредзенє правох националних меншинох у рамикох Акцийного плану за 23. поглавє прегваркох о уходу до Европскей униї.
 

ВИВЕРШНИ ОДБОР
Вивершни одбор у 2016. року треба же би робел и одвитовал за тото цо му обовязка предвидзена зоз Статутом, координовал роботу одборох, роботних целох, пододборох и подручних канцеларийох, и у найлєпшим шветлє представял руску заєднїцу пред ресорнима министерствами, орґанизациями Европскей униї, нєвладовим сектором, же би ше закладал пред шицкима орґанами власци у цилю обезпечованя шицких нєобходних потребох и интересох за нашу руску заєднїцу.
 

ОДБОР ЗА ОБРАЗОВАНЄ
Окремни акцент у 2016. року, алє и у тим мандату, жадам дац на дзеци зоз предшколских установох по наших местох, а то стретнуца предшколских дзецох и акция уписованя истих до руских оддзелєньох першей класи. Єден од приоритетох ми будзе и предлужиц зоз пренаходзеньом способа же би дзеци зоз державох дзе жию Руснаци (Словацка, Україна...) пришли до руского оддзелєня Ґимназиї у нашей єдиней штреднєй школи по руски и же би могли леґално пребувац у интернату, з оглядом же ше вше баржей спольнюю условия за тото. План ми вшелїяк предлужиц зоз тим цо започате у тим 2015. року, а то стипендовац предшколски дзеци, як и предлужиц тото цо ше указало як барз добре и у прешлим зволаню Совиту - стипендовац школярох основней и штреднєй школи и студентох, орґанизовац стретнуце школох, орґанизовац лєтню школу руского язика дзецом хтори ходза на порядну наставу по руски у основней школи и тим цо виучую руски язик. И того року заплановане обезпечиц учебнїки за школярох першей класи хтори виучую руски язик зоз елементами националней култури и учебнїки за грекокатилїцку виронауку за дзеци у першей класи. Тиж так цо ше указало добре у тим року, то приход дзецох нїзших класох хтори виучую руски язик зоз наших местох на Драмски мемориял "Петро Ризнич Дядя" и орґанизовац им цалодньове пребуванє. Просвитним роботнїком и воспитачком обезпечиц єден семинар у цеку рока. Предлужиц закладаня прейґ Координациї националних совитох за обезпечованє просвитних совитнїкох за наставу на руским язику, подзвигнуц статус руского язика як виборного предмета у основней школи, и за пременку статуса руского язика у штреднїх школох зоз факултативного до виборного предмету.  
 

ОДБОР ЗА КУЛТУРУ
Календар манифестацийох за 2016. рок, ми єдна зоз найважнєйших обовязкох хтори треба спольнїц, кед у питаню култура. Моцнїц руски професийни институциї котри творя фундамент националного и културного идентитету Руснацох. Шицки 20 манифестациї хтори ше отримую по шицких наших местох дзе жию Руснаци требало би надалєй успишно чувац и так указац припадносц нашей рускей заєднїци, єй културне нашлїдство и допринос толеранциї и конструктивному сотруднїцтву з другима людзми и заєдїцами зоз хторима Руснаци вєдно жию. На то нас обовязує и Национална стратеґия. План ми у тим року материялно помогнуц и нашо хори хтори робя при наших КУД-ох, а тиж и фолклорним секцийом и тамбуровим орхестром при наших КУД-ох з цильом моцнєня и дзвиганя квалитету наших манифестацийох. Помогнуц и нашим штиром КУД-ом у 2016. року (Дюрдьов, Нови Сад, Шид и Нове Орахово). У сотруднїцтве зоз Заводом за културу войводянских Руснацох и Одбору за културу Националного совиту Руснацих, того року би требали буц реализовани два семинари за кореоґрафох, корепетиторох и руководительох фолклорних ансамблох. Тиж так на основи прелиминарних розгваркох зоз людзми у ресорним Секретерияту у 2016 року постої можлївосц за доставанє обєкта "Замок" у Руским Керестуре на хаснованє на вецей роки а з тим и предусловия за формованє ґалериї руских подобових уметнїкох, рускей музичней збирки, рускей националней библиотеки и рускго националного архиву. На то нас обовязує и Национална стратеґия. По законченю судского поступку, знїманя гипотеки зоз нєрухомосци хтори ше обчекує у цеку 2016 року тиж плануєм и купованє старей рускей хижи у Руским Керерстуре на Вельким шоре и початок єй рехабилитациї у сотруднїцтве зоз Покраїнским заводом за защиту памятнїкох.
 

ОДБОР ЗА ИНФОРМОВАНЄ
Найзначнєйши активносци у 2016. року у информованю то можлївосц снованя "Рутенрадио". План и надалєй софинансованє дньовей информативней аґенциї Рутенпрес, софинансованє едукативних проєктох наменєних новинаром, редактором, вибраним або менованим ношительом явних функцийох у рускей заєднїци. План ми же би Одбор за информованє у медийох робел промоцию упису дзецох до руских оддзелєньох у образовних установох. Робиц на тим же би злєпшала технїчна опременосц медийох и вшелїяк провадзенє локалних медийох хтори информую и на руским язику после законченей приватизациї. У сотруднїцтве зоз другима одборами пренайсц способи  за правенє рисованих филмох, анимацийох и интернет порталох по руски през  хтори би дзеци през бависко учели наш язик.
 

ОДБОР ЗА СЛУЖБЕНЕ ХАСНОВАНЄ ЯЗИКА И ПИСМА
Цо ше дотика того Одбору, на першим месце будзе сотруднїцтво медзи Националним совитом и локалнима самоуправами дзе жию Руснаци. Ту ше отвераю вельо питаня о хторих треба бешедовац. Уплївовац же би ше совити за медзинационални одношеня, хтори по Статуту єдинкох локалней самоуправи обовязно формовац, частейше сходзели, бо ше схадзки нє заказую и по два роки. Сцем спозориц же нє дефиновани критериюми по хторих би локални самоуправи требали видвойовац средства зоз буджету за меншини чий язик у службеним хаснованю у тей општини. Тиж нєобходне поробиц анкету же яка заступеносц занятих людзох нашей рускей заєдїци на виборних и сталних роботних местох.
 

РОБОТНЕ ЦЕЛО ЗА НАУКУ
План Роботного цела за науку же би орґанизовали наукову конференцию з нагоди двасто рокох од народзеня Петра Кузмяка, участвованє на медзинародних наукових конференцийох дзе ше будзе представяц руски язик и науково досяги Руснацох на тих преосторох. Тиж нєобходне обезпечиц порядне видаванє наукового часопису ²Русинистични студиї² Оддзелєня за русинистику Филозофского факултету у Новим Садзе.
 

РОБОТНЕ ЦЕЛО ЗА МЛАДЕЖ
Провадзиц роботу Роботного цела за младеж хтора ше одноши на финансованє проєктох за младих, же би мушели обрациц окремну увагу на звекшованє свидомосци при младих Руснацох, же би участвовали у отримованю явней годзини дзе би през розгварку зоз школярами указали на значносц участвованя у процесох вязаних за Национални совит. Же би дали свой час, енерґию, знанє коло помоци орґанизованя Лєтней школи, робели на писаню приєктох, були учашнїки у промоциї при упису до нашей єдиней Ґимназиї по руски и же би витворели шицки активносци за младих хтори плановани у наиходзацим 2016. року по наших местох и же би як и того року так и у 2016. року нащивели стари край.
 

РОБОТНЕ ЦЕЛО ЗА СПОРТ
План ми дац им потримовку коло орґанизациї Спортских бавискох “Яша Баков”, а окреме у тим 2016. року кед ше планує орґанизовац преслава 25-тих по шоре, же би и на таки способ, прейґ спорта, припаднїки нашей Националней заєднїци чували свой национални идентитет.
 
Национални совит Руснацох
Славко Рац, предсидатель