Статут

На основи члена 75, 79. и 80. Устава Републики Сербиї (Службени глашнїк РС”, число 98/2006) и члена 6. Закона о националних совитох националних менших („Службени глашнїк РС”, число 72/2009, 20/2014 - одлука УС и 55/2014), Национални совит рускей националней меншини, на схадзки хтора отримана дня  06.12.2014. року у Новим Садзе, принєсол

С Т А Т У Т

НАЦИОНАЛНОГО СОВИТУ РУСКЕЙ НАЦИОНАЛНЕЙ МЕНШИНИ

I ОСНОВНИ ОДРЕДБИ

Член 1.

Статут найвисши правни акт Националного совиту рускей националней меншини (у дальшим тексту: Национални совит) зоз хторим ше реґулує компетенцию, орґанизацию и способ вибору орґанох, як и други питаня хтори значни за роботу Националного совиту, у складзе з Уставом Републики Сербиї и Законом о националних совитох националних меншинох (у дальшим тексту: Закон).

Член 2.

Национални совит представя руску националну меншину на териториї Републики Сербиї у обласци образованя, култури, обвисцованя и службеного хаснованя язика и писма, участвує у процесу одлучованя або одлучує о питаньох зоз тих обласцох, снує установи, привредни дружтва и други орґанизациї зоз тих обласцох.

Член 3.

Национални совит ма свойство правней особи хторе здобува з уписом до Реґистру националних совитох националних меншинох хтори водзи Министерство цо компетентне за людски и меншински права (у дальшим тексту: Министерство).

Национални совит представя и заступа предсидатель Националного совиту.

Член 4.

Назва Националного совиту на сербским язику глаши:

НАЦИОНАЛНИ САВЕТ РУСИНСКЕ НАЦИОНАЛНЕ МАЊИНЕ.

Назва Националного совиту на руским язику глаши:

НАЦИОНАЛНИ СОВИТ РУСКЕЙ НАЦИОНАЛНЕЙ МЕНШИНИ.

Член 5.

Шедзиско Националного совиту у Руским Керестуре, Фрушкогорска 64.

Член 6.

Символ Националного совиту таки:

 

Член 7.

Национални совит ма печац округлей форми, пречнїку 41 mm зоз шлїдуюцим текстом:

         На сербским язику и з кирилским писмом: "Национални савет русинске националне мањине Нови Сад“ и "Национални совит рускей националней меншини Нови Сад" на руским язику, а у штредку печаца ше находзи герб Руснацох у Републики Сербиї.

         Национални совит ма ище єден печац округлей форми, пречнїку 28 mm и текст: Национални совит рускей националней мешини, виписани на сербским язику и з кирилиским писмом и на руским язику и писму и герб Руснацох у Републики Сербиї у штредку.


II КОМПЕТЕНЦИЇ НАЦИОНАЛНОГО СОВИТУ

Член 8.

Национални совит, у складзе з Уставом и Законом, прейґ своїх орґанох самостойно:

1. приноши и меня Статут;

2. приноши финансийни план, финансийни звит и закончуюци рахунок;

3. розполага з власним маєтком;

4. одлучує о назви, символох и печацу Совиту;

5. утвердзує предкладаня националних символох, ознакох и шветох националней меншини;

6. снує установи, здруженя, фондациї, привредни дружтва у обласци култури, образованя, обвисцованя и службеного хаснованя язика и писма;

7. предклада представителя националней меншини до совиту за медзинационални одношеня у єдинки локалней самоуправи;

8. установює и додзелює припознаня;

9. иницирує приношенє и провадзи запровадзованє законох и других предписаньох з обласци култури, образованя и службеного хаснованя язика и писма;

10. участвує у пририхтованю предписаньох и предклада вименки и дополнєня предписаньох зоз хторима ше ушорює з Уставом ґарантовани права националних меншинох у обласци култури, образованя, информованя и службеного хаснованя язика и писма;

11. предклада окремни предписаня и дочасни мири у обласцох у хторих ше витворює право на самоуправу, пре посцигованє подполней ровноправносци медзи припаднїками националней меншини и гражданами хтори припадаю векшини;

12. порушує поступок пред Защитнїком гражданох, покраїнским и локалним омбудсманом и другима компетентнима орґанами, кед оценї же пришло до потупеня з Уставом и Законом ґарантованих правох и шлєбодох припаднїкох националних меншинох;

13. порушує поступок з точки 12. того члена у мено припаднїкох националней меншини, з предходно обезпеченим овласценьом у писаней форми;

14. забера становиска, порушує инициятиви и поднїма мири у вязи з тима питанями хтори нєпоштредно повязани з положеньом, идентитетом и правами националней меншини;

15. приноши Дїловнїк о своєй роботи;

16. прилапює звити о роботи предсидателя Националного совиту, Вивершного одбору, одборох и секретара; и

17. одлучує о других питаньох хтори му зверени зоз Законом.

Сотруднїцтво з державнима орґанами, орґанами автономней покраїни и орґанами локалней самоуправи

Член 9.

Национални совит може поднєсц державним орґаном, орґаном автономней покраїни, як и орґаном єдинки локалней самоуправи и окремним орґанизацийом, предкладаня, инициятиви и думаня о питаньох зоз своєй компетенциї, у складзе зоз Законом.

Национални совит може дац инициятиву Влади Републики Сербиї за утаргованє, односно понїщованє предписаньох державних орґанох и окремних орґанизацийох, хтори нє у складзе з одредбами того закона и других законох и педписаньох хтори ше одноша на национални меншини.


Медзинародне и реґионалне сотруднїцтво

Член 10.

Национални совит, у складзе з Уставом и Законом, сотрудзує з медзинароднима и реґионалнима орґанизациями, як и з державнима орґанами, националнима совитами або подобнима целами националних меншинох.

Представителє националних совитох участвую у роботи мишаних медзидержавних целох хтори маю задаток надпатрац спроводзенє билатералних медзидержавних спорозуменьох о защити правох одредзеней националней меншини.

Член 11.

Представителє националних меншинох участвую, прейґ Совиту Републики Сербиї за национални меншини, у поступку заключованя, односно приступаня ґу медзинародним або реґионалним спорозуменьом хтори ше одноша на положенє и защиту правох националних меншинох.

Схадзки Националного совиту

Член 12.

Национални совит одлучує о питаньох зоз своєй компетенциї на схадзкох.

Схадзки ше отримує по потреби, а найменєй раз у шейсцох мешацох и водзи ше их на руским язику або, по потреби, на сербским язику.

Национални совит полноважно одлучує на схадзки на хторей присутна вецей як половка членох Националного совиту.

Способ одлучованя

Член 13.

Национални совит одлучує з векшину гласох вкупного числа членох Националного совиту:

- о приношеню и пременки Статуту, о приношеню финансийного плану и закончуюцого рахунку Националного совиту; и

- о вибераню и розришованю предсидателя, подпредсидателя, предсидателя и членох Вивершного одбору, предсидателя и членох одборох и роботних целох и секретара Националного совиту.

Други одлуки Национални совит приноши з векшину гласох присутних членох.

III КОНСТИТУОВАНЄ НАЦИОНАЛНОГО СОВИТУ

Член 14.

Конститутивну схадзку Националного совиту зволує министер, так же би вона була отримана у чаше 20 дньох од утвердзованя резултатох виберанкох.

На конститутивней схадзки ше потвердзує мандати членох Националного совиту.

Мандат члена Националного совиту ше потвердзує на основи увереня о виборе члена Националного совиту и ришеня о додзельованю мандатох членох Националного совиту.

Национални совит конституовани з потвердзованьом мандатох шицких членох Националного совиту.

На першей схадзки ше вибера предсидателя.

IV ВИБОР НАЦИОНАЛОГО СОВИТУ

Член 15.

Национални совит ше вибера на основи условийох и поступку яки предписани зоз законом.

V СОСТАВ НАЦИОНАЛНОГО СОВИТУ

Член 16.

Национални совит ма 19 членох.

Мандат Националного совиту

Член 17.

Мандат Совиту почина з дньом конституованя Националного совиту и тирва док ше нє наполнї штири роки од конституованя.

Националному сотиву мандат престава скорей законченя мандату зоз розпущованьом, у складзе зоз Законом.

Мандат членох Националного совиту

Член 18.

Члена Националного совиту ше вибера на штири роки и може буц ознова вибрани за члена Националного совиту.

Членови Националного совиту мандат тирва тельо кельо тирва мандат Националного совиту и мандат му престава з конституованьом нового зволаня Националного совиту.

Член 19.

Членови Националного совиту мандат на хтори є вибрани у Националним совиту престава скорей часу:

1. зоз задзекованьом;

2. зоз траценьом общих условийох за здобуванє актвиного виберацкого права;

3. зоз ступаньом на роботу або пребераньом функциї хтора нєзлучна зоз членством у Националним совиту;

4. кед длужей як єден рок нє присуствує на схадзкох Националного совиту;

5. кед му место биваня  престанє буц на териториї Републики Сербиї;

6. кед є зоз конєчну одлуку компетентного орґана висцерани з окремного виберацкого списку рускей националней меншини;

7. кед є зоз правомоцну пресуду осудзени за виновне дїло на кару гарешту хтора  тирва длужей як шейсц мешаци; и

8. у случаю шмерци.

Член Националого совиту длужен овериц задзекованє при орґану хтори компетентни за оверйованє подписох и поднєсц го Национаолному совиту у чаше трох дньох од оверйованя, нєпоштредно або по препорученей пошти.

Преставанє мандата членови Националного совиту констатує Национални совит на першей идуцей схадзки по доставаню обвисценя о наступаню причини за преставанє мандата.

О преставаню мандата членови Националного совиту скорей законченя мандата Националного совиту, предсидатель Националного совиту обвисцує Републичну виберанкову комисию и Министерство.

Кед членови Националного совиту престанє мандат скорей законченя мандату Националного совиту, мандат ше додзелює першому шлїдуюцому кандидатови з виберанковей лїстини на хторей ше находзел член хторому престал мандат, у складзе зоз законом.

Права и обовязки членох Националного совиту

Член 20.

Член Националного совиту ма право: 

1. виберац и буц вибрани до орґанох Националного совиту;

2. участвовац у предкладаню, приношеню и сполньованю одлукох Националного совиту;

3. поставиц питанє и вимагац толкованє од орґанох Националного совиту и достац одвит пре витворйованє права зоз точки 2. того члена; и

4. вимагац и достац фахову помоц од орґанох Националного совиту пре окончованє своєй функциї.

Права членох Националного совиту ше блїжей ушори з окремним актом.

Член 21.

Член Националного совиту ма обовязку:

1. участвовац у роботи Националного совиту, Вивершного одбору або одбору чий є член;

2. у писаней форми або усно обвисциц предсидателя Националного совиту, предсидателя Вивершного одбору або предсидателя одобору чий є член у случаю зопартосци присуствовац на схадзки або кед є онєможлївени окончиц даєден налог; и

3. сполньовац одлуки або налоги орґанох Националного совиту и о тим подношиц звит.

Член 22.

Национални совит може мац почесних членох.

За почесного члена може буц менована особа хтора зоз свою роботу  дала окремне доприношенє унапредзеню положеня и правох припаднїкох рускей националней меншини у Републики Сербиї.

Особа хтору ше менує за почесного члена нє муши буц припаднїк рускей националней меншини.

На предкладанє предсидателя Националного совиту, предсидателя одбору або найменєй єдней трецини членох, Национални совит може принєсц одлуку о додзельованю статуса почесного члена. Одлуку ше приноши з векшину гласох вкупного числа членох Совиту.

Почесни член може участвовац у роботи роботних целох, без права одлучованя.

VI ОРҐАНИЗАЦИЯ НАЦИОНАЛНОГО СОВИТУ

ОРҐАНИ НАЦИОНАЛНОГО СОВИТУ

Член 23.

Национални совит ма предсидателя, єдного або вецей подпредсидательох, Вивершни одбор, одбори хтори основани у складзе зоз Законом и други роботни цела з обласци своєй компетенциї.

1. Предсидатель

Член 24.

Компетенциї предсидателя Националного совиту:

1. представя и заступа Национални совит;

2. зволує схадзки Националного совиту и предшедує на нїх;

3. предклада кандидатох за предсидателя, подпредсидательох и членох Вивершного одбору Националного совиту, як и секретара Националного совиту;

4. предклада план роботи и рочни финансийни план Националного совиту;

5. подноши Националному совиту звит о своєй роботи найменєй раз рочнє; 

6. предклада Националному совиту финайсийни звит и закончуюци рахунок;

7. подписує акти Националного совиту и записнїки зоз схадзки Националного совиту;

8. ма право зволац схадзку Вивершного одбору и роботних целох Националного совиту у позарядових обставинох;

9. ма право присуствовац на схадзкох одборох и других роботних целох Националного совиту, без права одлучованя;

10. одвитує за законїтосц роботи и дїлованя Националного совиту; и

11.  приноши акти у складзе з Уставом и Законом хтори ше одноша на дїлованє Националного совиту.

Предсидатель Националного совиту одредзує хто будзе заменїк предсидателя Националного совиту зоз шора подпредсидательох Националного совиту.

Член 25.

Предсидатель Националного совиту за свою роботу одвитує Националному совиту.

Член 26.

Национални совит вибера предсидателя зоз шора своїх членох.

Предкладанє за предсидателя Националного совиту дава найменєй єдна трецина членох Националного совиту. Предкладанє ше дава у писаней форми и муша го подписац члени хтори предкладаю кандидата.

Член Националного совиту може предложиц лєм єдного кандидата за предсидателя.

Предсидателя Националного совиту ше вибера з векшину вкупного числа членох Националного совиту.

Член 27.

Предсидательови Националного совиту мандат почина на дзень кед є вибрани и тирва по конституованє нового зволаня Националного совиту;

Мандат предсидательови престава скорей часу:

1. кед му престанє мандат члена Националного совиту;

2. зоз задзекованьом;

3. з розришеньом; и

4. пре шмерц.

Предсидателя Националного совиту ше розришує з истим поступком з яким  ше го и вибера.

Кед предсидатель нє розришени у поступку розришеня, нови поступок розришеня нє може буц порушани скорей як прейду 9 мешаци.

2. Подпредсидателє

Член 28.

Национални совит ма єдного або вецей подпредсидательох.

Число подпредсидательох Националного совиту ше утвердзує при вибераню подпредсидательох, на предкладанє Националного совиту.

Национални совит вибера подпредсидательох зоз шора Националного совиту, на предкладанє предсидателя Националного совиту.

Подпредсидательох Националного совиту ше вибера з векшину вкупного числа членох Националного совиту.

Подпредсидателє заменюю предсидателя Националного совиту у случаю кед є онєможлївени и представяю Национални совит на конференцийох, округлих столох и на подобних стретнуцох и схадзкох на хтори поволани представитель Националного совиту.

Член 29.

Одредби того Статуту о преставаню мандата предсидателя Националного совиту ше применює на преставанє мандата подпредсидателя.

3. Вивершни одбор

Компетенциї Вивершного одбору

Член 30.

Вивершни одбор:

1. пририхтує предлоги одлукох и актох Националного совиту;

2. пририхтує  вименки и дополнєня Статуту;

3. по потреби координує з роботу одборох и другиха роботниха целох Националного совиту;

4. сполнює одлуки Националного совиту;

5. контролує и провадзи вивершованє одлукох Националного совиту;

6. приноши Дїловнїк о роботи Вивершного одбору; и

7. окончує и други роботи зоз своєй компетенциї.

Национални совит зверює Вивершному одбору одлучованє, приношенє думаньох и предкладаньох за чийо приношенє зоз законами з обласци компетенциї Националного совиту предвидзени период 15 днї або менєй.

  Одлуки хтори принєсол Вивершни одбор подпадаю под одоброванє на першей идуцей схадзки Националного совиту и одобрени су кед за нїх гласала вецей як половка членох Националного совиту. Кед Национални совит нє одобри одлуку Вивершного одбору, Вивершному одобору престава мандат, а одлука остава на моци.

Состав Вивершного одбору

Член 31.

Вивершни одбор ма предсидателя и членох.

Число членох Вивершного одбору ше утвердзує з вибераньом Вивершного одбору.

Национални совит вибера предсидателя и членох Вивершного одбору зоз шора Националного совиту,  на предкладанє предсидателя Националного совиту.

За членох Вивершного одбору нє може буц вибрани предсидатель Националного совиту.

Вивершни одбор ше вибера з векшину вкупного числа членох Националного совиту.

Член 32.

Предсидатель и члени Вивершного одбору за свою роботу одвитую Националному совиту.

Член 33.

Предсидателя Вивершного одбору, у случаю його одсутносци або зопартосци, заменює член Вивершного одбору хторого одредзи предсидатель Вивершного одбору.

Член 34.

Члени Вивершного одбору можу буц задлужени за обласци з компетенциї Националного совиту хтори утвердзени з Уставом, Законом и Дїловнїком о роботи Националного совиту.

Член 35.

Вивершни одбор обовязни периодично, а найменєй раз рочнє, поднєсц звит о своєй роботи Националному совиту.

Мандат Вивершного одобру

Член 36.

Мандат Вивершного одбору почина на дзень вибераня и тирва до конца маданту Националного совиту хтори го вибрал.

Скорей законченя мандату на хтори є вибрани, мандат Вивершного одбору престава:

1. у случаю наступаня ситуациї зоз члена 30. пасус 3. того Статуту; и

2. з розришеньом.

Вивершни одбор ше розришує по поступку по яким є и вибрани.

Член 37.

Одредби того Статуту о преставаню мандата предсидателя Националного совиту ше применює на преставанє мандата членох Вивершного одбору.

4. Одбори

Член 38.

Национални совит ма одбори, и то:

1. Одбор за образованє;

2. Одбор за културу;

3. Одбор за информованє; и

4. Одбор за службене хаснованє язика и писма;

Член 39.

Окремни роботни цела Националного совиту то:

1. Роботне цело за младеж;

2. Роботне цело за спорт;

3. Роботне цело за науку.

Национални може формовац и други роботни цела.

Овласценя одборох

Член 40.

Одбор у обласцох з компетенциї Националного совиту яки утвердзени зоз Законом:

1. пририхтує рочни план и програму роботи, финансийни план и финансийни звит и подноши го Вивершному одбору;

2. може предкладац приношенє одлукох Националному совиту и Вивершному одбору з обласци своєй роботи;

3. одлучує о питаньох хтори му Национални совит и Вивершни одбор зверели;

4. иницирує розправу о поєдиних питаньох;

5. провадзи стан у своєй обласци, составя звити и предклада мири за злєпшанє применьованя законох и других предписаньох зоз своєй обласци;

6. приноши Дїловнїк о роботи; и

7. окончує други роботи хтори му зверя Национални совит и Вивершни одбор.


Состав одбору

Член 41.

Национални совит з одлуку одредзує число членох у каждим одборе, хторе нє може буц менше як 5.

Предсидатель одбору одредзує заменїка предсидателя зоз шора членох одбору.

Предсидатель, заменїк предсидателя и члени одбору нє муша буц члени Националного совиту.

Предсидатель Националного совиту и подпредсидателє Националного совиту нє можу буц члени одборох.

Вибор членох одборох

Член 42.

Предкладанє за предсидателя и членох одборох може поднєсц предсидатель Националного совиту або найменєй єдна трецина членох Совиту.

Одбор ше вибера з тайним гласаньом з векшину вкупного числа членох Совиту.

У поглядзе других питаньох хтори вязани за вибор членох одборох сходно ше применює правила о виборе предсидателя Совиту.

Мандат одборох почина на дзень вибераня и тирва до конца мандату Националного совиту хтори го вибрал.

Мандат членох одборох

Член 43.

Скорей преставаня мандату на яки є вибрани, мандат членох одборох престава:

1. зоз задзекованьом;

2. з розришеньом; и

3. зоз шмерцу.

Член 44.

Одбор може формовац пододбори пре розпатранє одредзених питаньох зоз своєй компетенциї. 

Члени пододборох можу буц фаховци з обласци за хтору ше пододбор формує.

Вибор предсидателя и членох пододборох ше реґулує з Дїловнїком о роботи пододборох.

Член 45.

Национални совит може формовац и дочасово и окремни роботни цела пре розпатранє и ришованє одредзених питаньох зоз своєй компетенциї.

На способ вибераня, мандат и состав дочасових и окремних роботних целох применює ше одредби того Статуту о способе вибераня, мандату и составе одборох.

Член 46.

Способ роботи ше утвердзує з Дїловнїком о роботи роботних целох.

СЕКРЕТАР

Член 47.

Предсидатель Совиту предклада секретара Совиту.

Совит вибера секретара Совиту з векшину вкупного числа членох, на час тирваня мандата Совиту.

Мандат секретара Националного совиту тирва до конца мандату Националного совиту хтори го вибрал. 

Скорей часу на хтори є вибрани, мандат секретара престава;

1. зоз задзекованьом;

2. з розришеньом; и

3. зоз шмерцу.

Член 48.

Секретар Совиту:

1. руководзи з фахову службу Совиту;

2. стара ше о окончованю роботох у вязи з роботу Совиту;

3. спрам потреби пририхтує предкладаня одлукох чийо приношенє спада до компетенциї Совиту, предсидателя Совиту, Вивершного одбору, одборох або других роботних целох Националного совиту; 

4. участвує у роботи Националного совиту, Вивершного одбору, комисийох и роботних целох Националного совиту без права одлучованя;

5. стара ше о окончованю орґанизацийних роботох у вязи з роботу роботних целох Совиту;

6. стара ше о составяню записнїкох зоз схадзкох Совиту, Вивершного одбору, одборох и  роботних целох Националного совиту;

7. стара ше о обявйованю правних актох Националного совиту;

8. стара ше о пририхтованю предлогох одлукох Националного совиту, Вивершного одбору або роботних целох Националного совиту;

9. помага предсидательови Националного совиту коло пририхтованя и зволованя схадзкох Националного совиту;

10. запровадзує одлуки Националного совиту, предсидателя Националного совиту и предсидателя Вивершного одбору;

11. окончує други роботи хтори му зверя предсидатель Националного совиту и предсидатель Вивершного одбору зоз своїх компетенцийох; и

12. утвердзує роботи фаховей служби у поглядзе орґанизациї роботи, пририхтованя и запровадзованя одлукох Националного совиту и Вивершного одботу Националного совиту.

Член 49.

Секретар Националного совиту за свою роботу одвитує Националному совиту и предсидательови Националного совиту и подноши им рочни звит о своєй роботи.

ФАХОВА СЛУЖБА

Члан 50.

Национални совит формує Фахову службу за окончованє роботох Совиту, пририхтованє, вивершованє и контролу вивершованя одлукох.

Фахова служба Националного совиту окончує административни роботи хтори вязани за роботу орґанох Националного совиту.

З роботу Фаховей служби руководзи секретар Совиту.

VII ЯВНОСЦ РОБОТИ

Член 51.

Робота Националного совиту явна.

Явносц роботи ше обезпечує зоз:

1. обявйованьом Статуту, одлукох и других актох на интернет-презентациї Националного совиту;

2. посиланьом поволанкох и материялох зоз схадзкох средством явного информованя; и

3. оможлївйованьом присуства на схадзкох представительом средствох информованя и  другим заинтересованим особом, у складзе зоз Дїловнїком о роботи Националного совиту.

VIII ФИНАНСОВАНЄ РОБОТИ НАЦИОНАЛНОГО СОВИТУ

Член 52.

Средства за финансованє роботи Совиту ше обезпечує з буджету Републики Сербиї, буджету Автономней Покраїни Войводини и буджетох єдинкох локалней самоуправи, донацийох и инших приходох.

Предсидатель Совиту одвичательни за финансийну роботу Националого совиту, у складзе зоз Законом.

IX АКТИ НАЦИОНАЛНОГО СОВИТУ

Член 53.

Найвисши правни акт Националного совиту то Статут.

Совит прилапює Статут з векшину вкупного числа членох Совиту.

Предкладанє за пременку Статуту може поднєсц найменєй єдна трецина членох Совиту.

Предкладанє ше подноши у писаней форми, з обгрунтованьом. У предкладаню муша буц ясно означени одредби чию ше пременку предклада и пременка яку ше предклада.

Член 54.

У роботох зоз своєй компетенциї Национални совит приноши одлуки, заключеня, ришеня, согласносци, думаня, правилнїки, предкладаня, препорученя, упутства и други акти.

Предсидатель Националного совиту може принєц правилнїки, ришеня, заключеня, розкази и упутства.

Вивершни одбор, одбори и други роботни цела приноша дїловнїки, заключеня, предкладаня одлукох, упутства.

X УСОГЛАШЕНОСЦ ПРАВНИХ АКТОХ, ОБЯВЙОВАНЄ И СТУПАНЄ НА МОЦ

Член 55.

Статут муши буц у складзе з Уставом и Законом.

Одлуки и общи акти Националного совиту муша буц у складзе з Уставом, Законом и Статутом.

Акти предсидателя Националного совиту, Вивершного одбору, одборох и других роботних целох муша буц и складзе зоз Законом, Статутом, одлуками и актами Националного совиту.

XI ЗАКОНЧУЮЦА ОДРЕДБА

Член 56.

Статут ступа на моц осми дзень по обявйованю на сайту Националного совиту рускей националней меншини.

 ПРЕДСИДАТЕЛЬ
НАЦИОНАЛНОГО СОВИТУ,
Славко Рац