ПЛАН РОБОТИ ПРЕДСИДАТЕЛЯ НАЦИОНАЛНОГО СОВИТУ ЗА 2015. РОК

На основи члена 24 став 1 точка 4 Статута Националного совиту рускей националней меншини у обовязки сом представиц план роботи Националного совиту за 2015 рок.
Як и прешлих рокох так и того нєбходне будзе сотрудзовац зоз шицкима представнїками власци у Републики Сербиї (републичней, покраїнскей и локалней), зоз подписнїками медзиреґионалного сотруднїцтва (Прешовским самоуправним крайом у Словацей и Закарпатску обласцу у України), зоз шицкима институциями и установами хторим Национални совит снователь лєбо соснователь, зоз подручнима канцелариями, културно уметнїцкима дружтвами, нєвладовим сектором и шицкима тима хтори робя на хасен нашей рускей заєднїци.

ВИВЕРШНИ ОДБОР

Вивершни одбор у тим року треба же би робел и одвитовал за тото цо му обовязка предвидзена зоз Статутом, координовал роботу одборох и роботних целох, у найлєпшим шветлє представял руску заєднїцу пред ресорнима министерствами, орґанизациями Европскей униї, нєвладовим сектором, же би ше закладал пред шицкима орґанами власци у цилю обезпечованя шицких нєобходних потребох и интересох за нашу руску заєднїцу.

ОДБОР ЗА ОБРАЗОВАНЄ

Окремни акцент у тим року, алє и у тим мандату, жадам дац на дзеци зоз предшколских установох по наших местох, а то стретнуца предшколцох и їх родичох и акция уписованя истих до руских оддзелєньох першей класи. Єден од приоритетох ми будзе и найсц модел по хторим би дзеци зоз державох дзе жию Руснаци (Словацка, Україна...) пришли до руского оддзелєня Ґимназиї у нашей єдиней штреднєй школи по руски, з оглядом же ше вше вецей спольнюю условия за тото (подписованє медзиреґионалного спорозуменя, активносци хтори пребера директорка школи...). План ми вшелїяк предлужиц зоз тим цо ше указало як барз добре и у прешлим зволаню Совиту а то стипендовац школярох основней и штреднєй школи и студентох, орґанизовац стретнуце школох, орґанизовац лєтню школу руского язика дзецом хтори ходза на порядну наставу по руски у основней школи и тим цо факултативно виучую руски язик. И того року заплановане обезпечиц учебнїки за школярох першей класи хтори виучую факултативно руски язик зоз елементами националней култури. Просвитним роботнїком и воспитачком обезпечиц єден семинар у цеку рока.

ОДБОР ЗА КУЛТУРУ

Календар манифестацийох за 2015. рок, ми єдна зоз найважнєйших обовязкох хтори треба спольнїц у тим року, кед у питаню култура. Моцнїц руски професийни институциї котри творя фундамент националного и културного идентитету Руснацох. Шицки 20 манифестациї хтори ше отримую по шицких наших местих дзе жию Руснаци требало би надалєй успишно чувац и так указац припадносц нашей рускей заєднїци, єй културне нашлїдство и допринос толеранциї и конструктивному сотруднїцтву з другима людзми и заєдїцами зоз хторима Руснаци вєдно жию. На то нас обовязує и Национална стратеґия. План ми у тим року материялно помогнуц и нашо хори хтори робя при наших КУД-ох, тиж помогнуц и нашим штиром КУД-ом (Коцур, Вербас, Бикич Дол и Ср.Митровица), а у 2016. року (Дюрдьов, Нови Сад, Шид и Нове Орахово). У сотруднїцтве зоз Заводом за културу войводянских Руснацох и Одбору за културу Националного совиту Руснацих, того року би требали буц реализовани два семинари за кореоґрафох, корепетиторох и руководительох фолклорних ансамблох. У планє за тот рок и апликованє до Европских фондох прейґ Централного институту за конзервацию з Беоґраду за реконструкцию обєктох и олтара хтори од велького значеня за руску заєднїцу.

ОДБОР ЗА ИНФОРМОВАНЄ

Найзначнєйши активносци у тим року у информованю то приватизация локалних медийох и информованє на руским язику на локалним уровню. План и надалєй софинансованє дньовей информативней аґенциї Рутенпрес, софинансованє едукативних проєктох наменєних новинаром, редактором, вибраним або менованим ношительом явних функцийох у рускей заєднїци. План ми же би Одбор за информованє у медийох робел промоцию упису дзецох до руских оддзелєньох у образовних установох. Робиц на тим же би злєпшала технїчна опременосц медийох и вшелїяк потримовка локалним медийом хтори информую и на руским язику у поступку приватизациї. Сотрудзовац зоз другима информативнима писанима медиями на сербским язику, а хтори жадаю писац о нас.

ОДБОР ЗА СЛУЖБЕНЕ ХАСНОВАНЄ ЯЗИКА И ПИСМА

Цо ше дотика того Одбору, на першим месце будзе сотруднїцтво медзи Националним совитом и локалнима самоуправами дзе жию Руснаци. Ту ше отвераю вельо питаня о хторих треба бешедовац. Уплївовац же би ше совити за медзинационални одношеня, хтори по Статуту єдинкох локалней самоуправи обовязно формовац, частейше сходзели, бо ше схадзки нє заказую и по два роки. Сцем спозориц же нє дефиновани критериюми по хторих би локални самоуправи требали видвойовац средства зоз буджету за меншини чий язик у службеним хаснованю у тей општини. Тиж нєобходне поробиц анкету же яка заступеносц занятих людзох нашей рускей заєдїци на виборних и сталних роботних местох. Викладанє наших националних символох тиж проблем хтори жадам ришовац.

РОБОТНЕ ЦЕЛО ЗА НАУКУ

План Роботного цела за науку же би закончели виглєдовацки проєкт по конєц того року, так же би рукопис кнїжки “Михайло Мункачи (1875-1950) - живот и дїло” бул закончени. Тиж нєобходне у тим року же би Оддзелєнє за русинистику Филозофского факултету у Новим Садзе порихтало перше число наукового часопису Русинистични студиї котре би требало нєодлуга висц у електронскей форми.

РОБОТНЕ ЦЕЛО ЗА МЛАДЕЖ

Провадзиц роботу Роботного цела за младеж хтора ше одноши на финансованє проєктох за младих, же би мушели обрациц окремну увагу на звекшованє свидомосци при младих Руснацох, же би участвовали у отримованю явней годзини дзе би през розгварку зоз школярами указали на значносц участвованя у процесох вязаних за Национални совит. Же би дали свой час, енерґию, знанє коло помоци орґанизованя Лєтней школи, и же би витворели шицко активносци за младих хтори плановани у тим 2015 року по наших местох и же би нащивели стари край.

РОБОТНЕ ЦЕЛО ЗА СПОРТ

План ми дац им потримовку коло орґанизациї Спортских бавискох “Яша Баков”, же би и на таки способ, прейґ спорта, припаднїки нашей Националней заєднїци чували свой национални идентитет.
       
   

 

                                                                                         Предсидатель Националного совиту
                                                                                                             Славко Рац