Резултати виберанкох за штварте зволанє НС - октобер 2014.

Лоґа виберанкових лїстинох

 

Спрам конечних резултатох, хтори 30. октобра обявели Републична виберанкова комисия (РИК), на виберанкох за национални совити националних меншинох, хтори у цалей Сербиї отримани внєдзелю, 26. октобра, за Национални совит (НС) Руснацох гласали 3 317, односно 40,11 одсто з 8 270 Руснацох уписаних до окремного виберацкого списку (цо за 6 особи вецей у одношеню на ОВС заключени 10. октобра). Руснаци у цалей держави гласали на 155 виберацких местох, важаци лїстки було 3 281, а нєважаци 35.
На виберанкох за нове зволанє НС Руснацох участвовали седем виберанково лїстини - ”РУСКА ЛИҐА” ОЛЕНА ПАПУҐА, зоз 16 кандидатами, ”ЗА РУСКИ КЕРЕСТУР - ЖЕЛЬКО КОВАЧ”, з 12 кандидатами, ”ВЄДНО ЗА РУСНАЦОХ - СЛАВКО РАЦ”, з 18 кандидатами, ”Я РУСНАК”, з 19 кандидатами, ”РУСКА МЛАДЕЖ”, з 13 кандидатами, ”МЛАДИ ЗА БУДУЧНОСЦ”, з 12 кандидатами и РУСКА ИНИЦИЯТИВА, МИКОЛА ШАНТА, з 19 кандидатами. Виберало ше 19 членох Националного совиту.
Найвецей гласи - 806, лєбо 24,57 одсто з важацих виберацких лїсткох гласачох котри 26. октобра вишли на виберанки, достала лїстина „Вєдно за Руснацох-Славко Рац”, хтора у новим Совиту будзе мац пейц мандати. Лїстина „Руска лиґа” Олена Папуґа достала 634 гласи, односно 19,32 одсто важацих лїсткох, и у новим зволаню Совиту будзе мац штири мандати.
Лїстина „За Руски Керестур-Желько Ковач” достала 526 гласи, лєбо 16,03 одсто, а „Я Руснак” 468 гласи, цо 14,26 одсто, так же у новим зволаню НС Руснацох буду мац по три мандати.
Лїстина Руска инициятива,Микола Шанта достала 399 гласи, лєбо 12,16 одсто, та з тим и два мандати, док на основи освоєних 254 гласох, лєбо 7,74 одсто, єден мандат припаднє лїстини „Млади за будучносц”, як и лїстини „Руска младеж”, хтора освоєла 194 гласи, лєбо 5,91 одсто важацих лїсткох гласачох котри вишли на виберанки - гваря прелиминарни податки з РИК.
Виходносц и резултати гласаня по местох дзе у векшим чишлє жию Руснаци
У Руским Керестуре найвецей гласи достала лїстина „За Руски Керестур-Желько Ковач” - 476, цо 47,98 одсто, потим „Руска лиґа” Олена Папуґа - 221 глас, цо 22,28 одсто. На трецим месце по числу достатих гласох лїстина „Вєдно за Руснацох-Славко Рац”, хтора достала 117 гласи, лєбо 11,79 одсто.
Надалєй, на штвартим месце по числу достатих гласох лїстина „Руска младеж” зоз 70 гласами, цо 7,06 одсто, а лїстина Руска инициятива,Микола Шанта у Керестуре достала 49 гласи, лєбо 4,94 одсто. За лїстину „Я Руснак” гласали 35 Керестурци, лєбо 3,53 одсто, а за лїстину „Млади за будучносц” 24-еро, лєбо 2,42 одсто з числа тих котри вишли на виберанки.
Виходносц нє була велька, понеже з вєдно 2 660 уписани до ОВС, свойо право гласа на штирох виберацких местох у Керестуре  вихасновали 1 002 гласаче, цо 37,66 одсто. Найвекша виходносц була на гласацким месце у просторийох Добродзечного огньогасцого дружтва, дзе з 580 уписаних до ОВС гласали 229, цо 39,48 одсто; потим у просторийох Месней канцелариї (у Старей школи), дзе до ОВС були уписани 766 особи, а гласали 291, цо 37,98 одсто;  у терашнїх просторийох ”Рускому” (старим будинку Месней заєднїци) зоз 665 уписаних гласали 246, цо 36,99 одсто, док у просторийох школского будинку Замок зоз 649 уписаних до ОВС гласали 236 особи, цо 36,36 одсто. На шицких штирох виберацких местох було 10 нєважаци лїстки, так же, практично, нови НС Руснацох виберали 992 Керестурци.
Гласанє у Коцуре
На нєдзельових виберанкох за Национални совит Руснацох у Коцуре найвецей гласи достала лїстина ”Я Руснак” - 179, лєбо 33,33 одсто, а на другим месце Руска инициятива,Микола Шанта зоз 116 гласами, лєбо 21,60 одсто. По числу достатих гласох, у Коцуре на трецим месце лїстина „Млади за будучносц” зоз 113 гласами, цо 21,04 одсто з числа гласачох котри вишли на виберанки.
Лїстина „Вєдно за Руснацох-Славко Рац” достала 84 гласи Коцурцох, односно 15,64 одсто, „Руска лиґа” Олена Папуґа 32 гласи, цо 5,96 одсто, „Руска Младеж” достала 10 гласи, лєбо 1,86 одсто, а лїстина „За Руски Керестур-Желько Ковач” у Коцуре достала 3 гласи, цо 0,56 одсто. 
Право гласа у Коцуре мали 1 363 гласаче уписани до ОВС, а на трох виберацких местох - єдним у ОШ „Братство-єдинство” и на двох у просторийох Месней заєднїци, гласали 545 особи, лєбо 39,98 одсто, на хторих вєдно 8 лїстки були нєважаци. Найвецей гласачох у Коцуре було на виберацким месце у ОШ, дзе зоз 338 уписаних гласали 144, лєбо 42,6одсто. На виберацким месце у Малей сали МЗ гласали  202 з 500 уписаних, цо 40,4 одсто, а на виберацким месце у Велькей сали МЗ гласали 199 Коцурци, цо 37,9 з 525 ту уписаних до ОВС.
Гласанє у Новим Садзе и пригородских местох
На подручу Городу Нови Сад до окремного виберацкого списку (ОВС) уписане 953 Руснаци, а гласали 371. Лїстина ”Руска инициятива” достала 122 гласи, ”Руска лиґа” Олена Папуґа 90, а ”Вєдно за Руснацох-Славко Рац” 69 гласи.
За лїстину ”Я Руснак” гласали 49 гласаче, за ”Руску младеж” 20, а за лїстину ”Млади за будучносц” 10 гласаче. Лїстина ”За Руски Керестур-Желько Ковач” на подручу Нового Саду достала 9 гласи, а два лїстки були нєважаци.
У Петроварадинє з 81 уписаного гласал 41 гласач и ту лїстина ”Руска лиґа” достала 13, лїстини ”Вєдно за Руснацох”, ”Я Руснак” и ”Руска инициятива” по 9 гласи, а ”Млади за будучносц” єден глас.
У Сримскей Каменїци було 38 уписаних, а гласали 19 гласаче. Лїстина ”Руска инициятива” достала 8, ”Вєдно за Руснацох” 6, ”Руска лига” 3, а лїстина ”Я Руснак” 2 гласи. У Ветернику було 77 уписаних, а гласали 30 гласаче и ”Руска лига” достала 17, ”Вєдно за Руснацох” 9, ”Руска младеж” 3, а ”Руска инициятива” 1 глас.
У других пригородских местох коло Нового Саду (Бегеч, Футоґ, Руменка, Кисач, Кать и Будисава) вєдно були уписани 55 гласаче, гласали 21, а гласи подєднак розподзелєни - лїстина ”Я Руснак” достала 5, ”Вєдно за Руснацох” и ”Руска инициятива” по 4 гласи, ”Руска лиґа” 3 гласи, ”За Руски Керестур” и ”Млади за будучносц” по 2, а лїстина ”Руска младеж” 1 глас.
Гласанє у Вербаше
У Вербаше найвецей гласи достала лїстина „Вєдно за Руснацох-Славко Рац” - 119, лєбо 39,27 одсто тих котри внєдзелю вишли на виберанки. Друга по шоре лїстина „Млади за будучносц” зоз 77 гласами, лєбо 25,41 одсто, а треца Руска инициятива, Микола Шанта зоз 40 гласами, лєбо 13,20 одсто.
Лїстина „Руска лиґа” Олена Папуґа у Вербаше достала 30 гласи, цо 9,9 одсто, лїстина „Я Руснак” достала 14 гласи, лєбо 4,62 одсто, потим лїстина „Руска младеж” 13 гласи, цо 4,29 одсто, а лїстина „За Руски Керестур-Желько Ковач” у Вербаше достала 10 гласи, лєбо 3,30 одсто.
До окремного виберацкого списку у Вербаше були уписани 648 Руснаци, а на 5 виберацких местох гласали 305 особи, односно 47,07 одсто и зазначени лєм єден нєважаци лїсток.
Гласанє у Дюрдьове, Ґосподїнцох и Жаблю
Спрам прелиминарних резултатох, на виберанкох за Национални совит Руснацох у жабельскей општини найвецей - 150 гласи, лєбо 49,83 одсто виберачох котри 26. октобра гласали - достала лїстина „Вєдно за Руснацох-Славко Рац”. На другим месаце у општини лїстина „Руска младеж”, хтора достала 62 гласи, лєбо 20,59 одсто, а на трецим месце „Руска лиґа” Олена Папуґа зоз 39 гласами, цо 12,95 одсто.
У Дюрдьове лїстина „Вєдно за Руснацох-Славко Рац” достала 135 гласи, лєбо 48,91 одсто, „Руска младеж” 62 гласи, лєбо 22,46 одсто, а „Руска лиґа” Олена Папуґа 34 гласи, цо 12,32 одсто.
На  штвартим месце по числу достатих гласох у Дюрдьове лїстини „Я Руснак” и Руска инициятива,Микола Шанта, хтори достали по 20 гласи (0,8 одсто); лїстина „Млади за будучносц” достала 4 гласи, а лїстина „За Руски Керестур-Желько Ковач” 1 глас.
У Ґосподїнцох лїстини „Вєдно за Руснацох-Славко Рац” и „Я Руснак” достали по 5 гласи, а лїстина ”Руска лиґа” Олена Папуґа” 3 гласи.
У Жаблю лїстина „Вєдно за Руснацох-Славко Рац” достала 10 гласи, а „Руска лиґа” Олена Папуґа 2 гласи. 
У жабельскей општини Руснаци гласали на трох виберацких местох - по єдним у будинкох ОШ у Дюрдьове, Ґосподїнцох и Жаблю, а у цалей општини до ОВС були уписани 815 Руснаци и гласали вєдно 311, цо 38,15 одсто.
Найвекша виходносц у општини була у Дюрдьове, дзе внєдзелю гласали 285 особи зоз 684 уписаних до ОВС, цо 42 одсто, а 9 лїстки були нєважаци. Исти процент виходносци на виберанки бул и у Жаблю, понеже гласали 12 з 28 уписаних, док у Ґосподїнцох виходносц на виберанки за НС була барз мала, понеже зоз 103 уписаних до ОВС, гласали лєм 14  гласаче.
Гласанє у Сриме
Спрам перших, нєурядових резултатох, на виберанкох за Национални совит Руснацох у шидскей општини найвецей гласи достала лїстина ”Вєдно за Руснацох-Славко Рац” - 119, лєбо 40,89 одсто. На другим месце лїстина „Я Руснак” зоз 93-ома гласами, лєбо 31,96 одсто, а на трецим лїстина „Руска лиґа” Олена Папуґа, хтора достала 69 гласи, лєбо 23,71 одсто гласачох котри гласали.
Штварта по шоре у цалей општини Руска инициятива,Микола Шанта зоз штирома гласами, на пиятим месце Руска младеж, хтора достала 3 гласи, лїстина „За Руски Керестур-Желько Ковач” у шидскей општини достала 2 гласи, а „Млади за будучносц” єден глас.
У Шидзе найвецей гласи достала лїстина „Я Руснак” - 66, цо 55,46 одсто, потим „Вєдно за Руснацох-Славко Рац” 24 гласи, лєбо 20,16 одсто, а „Руска лиґа” Олена Папуґа достала 23 гласи, цо 19,32 одсто з числа гласачох котри вишли на виберанки.
Руска инициятива,Микола Шанта у Шидзе достала 3 гласи, а лїстини „За Руски Керестур-Желько Ковач”, „Руска младеж” и „Млади за будучносц” по єден глас.
У Бачинцох найвецей - 41 глас, лєбо 62,12 одсто, достала лїстина „Руска лиґа” Олена Папуґа, потим „Я Руснак” 16 гласи - 24,24 одсто, „Вєдно за Руснацох-Славко Рац” 6 гласи - 9,09 одсто и Руска младеж  1 глас, док други лїстини у Бачинцох нє достали гласи.
У Бикичу найвецей гласи достала лїстина „Вєдно за Руснацох-Славко Рац” - 89 цо 81,65 одсто, потим лїстина „Я Руснак” 11 гласи - 10,09 одсто; „Руска лиґа” Олена Папуґа достала 5 гласи - 4,58 одсто, а по єден глас достали лїстини „За Руски Керестур-Желько Ковач”, „Руска младеж” и Руска инициятива,Микола Шанта, док лїстина „Млади за будучносц” ту нє достала гласи.
У Шидзе на два виберацки места, на кельо ше гласало, вишли 119 Руснаци, цо 42,5 одсто з 280 уписаних до ОВС; у Бачинцох гласали 66 зоз 141 уписаного до ОВС, лєбо 46,8 одсто, а у Бикичу гласали 109, цо 61,23 одсто зоз 178 уписаних до ОВС.
У Сримскей Митровици було 185 уписаних гласачох, а гласали 90 особи. Лїстина ”Вєдно за Руснацох” достала 49, а лїстина ”Я Руснак” 35 гласи. Пейц гласи достала ”Руска лига”, а єден ”Руска младеж”.
У Кули, Крущичу и Зомборе
У Кули з уписаних 328 Руснацох гласали 96, а ту ”Руска лиґа” достала 27, ”Вєдно за Руснацох” 26, а лїстина ”Я Руснак” 14 гласи. Лїстина ”За Руски Керестур” у Кули достала 12 гласи, ”Руска инициятива” 11,  ”Млади за будучносц” 5 гласи, а єден лїсток бул нєважаци.
До ОВС у Крущичу уписане 47, а гласали 22 Руснаци. Лїстина ”Руска лиґа” ту достала 18 гласи, а лїстини ”За Руски Керестур” и ”Я Руснак” по 2 гласи.
У Зомборе з 27 уписаних гласали 8 Руснаци, а гласи розпоредзени так же лїстина ”Руска младеж” достала 4, а по два гласи достали ”За Руски Керестур” и ”Вєдно за Руснацох”.
Гласанє у Новим  Орахове, Бачкей Тополї и Суботици
У Новим Орахове було 115 уписаних, а гласали 54 гласаче. Лїстина ”Руска лиґа” ту достала 31 глас,  ”Млади за будучносц” 10, а ”Вєдно за Руснацох” 9 гласи. По 2 гласи достали ”Руска младеж” и ”Руска инициятива”.
У Бачкей Тополї з 68 уписаних гласали 22 Руснаци. Лїстина ”Вєдно за Руснацох” достала 10 гласи, ”Руска лиґа” 8, а ”Млади за будучносц” и ”Руска инициятива” по 2 гласи.
У Суботици було 85 уписаних гласачох, а гласали 36. За лїстину ”Руска лига” гласали 16, за ”Вєдно за Руснацох” 6, за лїстину ”Руска инициятива” 4 гласаче, лїстини ”Я Руснак” и ”Руска младеж” достали по три гласи, а лїстини ”За Руски Керестур” и ”Млади за будучносц” по 2 гласи.
У Беоґрадзе
У Беоґрадзе з 27 уписаних гласали 9 Руснаци и ту лїстина ”Вєдно за Руснацох” достала 4 гласи, ”Руска лиґа” и ”Млади за будучносц” по 2, а лїстина ”За Руски Керестур” єден глас.