Одлуки з електронскей схадзки - 26.12.2015.

Число: 367/15
Датум: 26.12.2015.

У складзе зоз членом 11 пасус 2 Дїловнїка о роботи Националного совиту рускей националней меншини, заказуєм Електронску схадзку

Електронска схадзка ше отрима у периодзе од 26. децембра по 12,00 годзин 28. децембра 2015. року.

У складзе зоз членом 11 пасус 3 Дїловнїка о роботи утвердзуєм

Дньови шор

1. Даванє думаня о предложених кандидатох за членох Управного одбора Дому култури Руски Керестур
2. Даванє думаня о предложеному кандидатови за  окончователя длужносци директора  Дому култури Руски Керестур
Материял за схадзку вам послани вєдно зоз дньовим шором.

1. Даванє думаня о предложених кандидатох за членох Управного одбора Дому култури Руски Керестур

У складзе зоз членом 28 пасус 1 Дїловнїка о роботи, кладзем на гласанє одлуку о першей точки дньового шору:

"Национални совит принєсол
Одлуку

Пре нєдостаток толкованя о причинох розришованя двох членох Управного одбору Дому култури скорей вицеку мандата на хтори су меновани и менованя двох нових членох Управного одбору Дома култури, Национални совит рускей националней меншини дава неґативне думанє о кандидатох за членох Управного одбора Дому култури Руски Керестур, предложених з боку локалней самоуправи:
 Елемир Рац, Фрушкогорска 98/а, Руски Керестур и
 Илона Зарубица, Яши Бакова 9, Руски Керестур.

Обгрунтованє:
Локална самоуправа Кула у складзе зоз Законом о култури и Одлуку о снованю Дому култури Руски Керестур 16.07.2015. року меновала 6 членох терашнього Управного одбору, а 17. децембра нам послали вимогу за даванє думаня о нових двох членох УО, без толкованя же кого и прецо розришую членства у Управним одборе. На нашу вимогу за толкованє тей ситуациї, наведли нам лєм членох котрих розришую, алє нє и причини за тото.

Модлїм членох Националного совиту же би прейґ електронскей пошти гласали и вияшнєли ше зоз „за”, „процив” або „стримани” о такей одлуки.

2. Даванє думаня о предложеному кандидатови за  окончователя длужносци  директора Дому култури Руски Керестур

У складзе зоз членом 28 пасус 1 Дїловнїка о роботи, кладзем на гласанє одлуку о другей точки дньового шору:

„Национални совит рускей националней меншини принєсол

Одлуку

Национални совит рускей националней меншини становиска же поступок розписованя явного конкурса за вибор директора Дому култури бул у складзе зоз законскима предписанями и прето дава неґативне думанє о Владимирови Малацкови з Руского Керестура, кандидатови за  окончователя длужносци  директора Дому култури Руски Керестур, предложеного з боку локалней самоуправи."

Модлїм членох Националного совиту же би прейґ електронскей пошти гласали и вияшнєли ше зоз „за”, „процив” або „стримани” о такей одлуки.

Здогадуєм членох Националного совиту же спрам члена 28 пасус 3 Дїловнїка о роботи, при електронским гласаню, члени Националного совиту свойо вияшньованє посилаю до Националного совиту и шицким членом Националного совиту.

Национални совит Руснацох
Славко Рац, предсидатель