Виберанки за национални совити буду 4. новембра

БЕОҐРАД – Министер за державну управу и локалну самоуправу Бранко Ружич потвердзел вчера же виберанки за национални совити буду розписани за 4. новембер и поволал припаднїкох националних меншинох же би ше уписали до Окремного виберацкого списку.

 

Виберанки буду розписани коло половки мешаца, а як гварел Ружич за РТС, совити за национални меншини задлужени занїмац ше зоз културу, образованьом и медиями на язикох националних заєднїцох, а нє зоз политику. Тринац одсто популациї Сербиї то припаднїки националних меншинох, цо ридкосц у державох у реґионє, а на цо Сербия горда.

 

– Ми тоту традицию чуваме и у велїх законох зме и понад европских стандардох кед слово о припаднїкох националних заєднїцох. Слово о позитивней дискриминациї при доставаню роботи, школованю и подобних активносцох, гварел министер.

 

На єшень ше будзе гласац у двацец єдним совиту за национални меншини, а чи будзе основани и двацец други, будзе завишиц од числа припаднїкох русийскей националней меншини.

 

– Нєпоштредни виберанки буду кед єст вецей як 40 одсто уписаних до Окремного виберацкого списку. Кед нє, вец ше представительох вибера поштредно, прейґ електорскей скупштини, наглашел Ружич.