Координация усоглашела становиска о Нарису закона

БЕОҐРАД – Штварток, 10. мая, у Беоґрадзе отримана Схадзка Координациї националних совитох националних меншинох на котрей присуствовали секретар Националного совиту Руснацох (НСР) Таня Арва Планчак и предсидатель Вивершного одбору НСР Желько Ковач.

 

Схадзка Координациї, з котру предшедовал Єне Гайнал, була зволана насампредз же би Координация националних совитох, пред схадзку Републичного совиту за национални меншини усоглашела свойо становиска.

 

После догварки же цо буду вимагац од Совиту, розпатрени и Звит о сайме котри отримани з нагоди означованя Медзинародного дня людских правох, котри бул отримани 10. децембра прешлого року. Координация мала заувагу же Звит нєподполни, та вимагали детальнєйши, окреме у часци финансованя истого.

 

Координация ше догварела же, гоч период предшедованя Националного совиту мадярскей националней меншини вицека нєодлуга, а румунски национални совит будуци котри будзе предшедовац, до змени нє придзе покля ше нє законча виберанки за нови зволаня националних совитох.

 

Виберанки за нови зволаня националних совиту би мали буц розписани у периодзе медзи 27. юлийом и 28. авґустом, а найпознєйше по 4. новембер треба же би були окончени.