Приоритет за средства од Министерства ма Мемориял

НОВИ САД – Стреду, 18. априла, на схадзки Вивершного одбору Националного совиту Руснацох (НСР), котра була отримана у просторийох Заводу за културу войводянских Руснацох, формоване предкладанє препоручених проєктох и дате думанє о кадрових ришеньох за установи котри повязани зоз руску националну заєднїцу.

 

По Конкурсу за финансованє и софинансованє проєктох з обласци сучасней творчосци; културни дїялносци националних меншинох у Републики Сербиї у 2018. року, хтори розписало Министерство култури и информованя, Вивершни одбор НС дал предкладанє препоручених проєктох по приоритетох.

 

Медзи осем проєктами котри сцигли на адресу Министерства, Вивершни одбор на перше место за глєданє средства (400 тисячи динари) положел за ювилейни 50. Драмски мемориял „Петра Ризнича Дядї“, гоч ше вон уж закончел.

 

Далєй, по приоритетним шоре, за глєданє средствох од Министерства Вивершни одбор потримал „Руски християнски календар за 2019. рок“ (500 тисячи динари), Фестивал „Веселинка“ (870 тисячи динари), Часопис „Шветлосц“, Фестивал „Червена ружа“, Представа „Бабушка“, Манифестация „Костельникова єшень“ и прекладательна роботня КУД „Жатва“.