Отримана схадзка Роботного цела за младеж НС

Млади

Пияток, 9. децембра, у Руским доме у Шидзе отримана шеста порядна схадзка Роботного цела за младеж Националного совиту (НС) рускей националней меншини, на хторей прилапени План роботи Роботного цела за 2017. рок, у хторим планована финансийна помоц у витворйованю проєктох младих, активносци на мотивованю уписованя младих Руснацох до Окремного виберацкого списку, а тиж и активносци на витворйованю змистох за младих у местох зоз значнєйшим числом Руснацох, як и медзи младима Руснацами у иножемстве.
На схадзки прилапени и Финансийни план Роботного цела за 2017. рок, з хторим за витворйованє проєктох опредзелєни 300 000 динари, а 50 000 динари за витворйованє змистох за младих по местох зоз значнєйшим числом Руснацох и медзи младима Руснацами у иножемстве.
Роботне цело за младеж прилапело вимогу Туристичного здруженя „Руски Керестур“ же би 7 000 динари хтори були унапрямени за проєкт „Лєтнї чилаут“, хтори нє витворени, унапрямело за 10. Медзинародни волонтерски камп „Лєто у Руским Керестуре 2016“, а за хтори остали нєвимирени шицки финансийни обовязки.
Тиж одлучене и же ше 60 000 динари унапрями РКЦ у Новим Садзе за знїманє и видаванє компакт-диску (CD) зоз шпиванками хтори були виведзени на програми „Еротика рутеника”, а вєдно з РКЦ, совидавателє того CD буду Роботне цело и младежски часопис „МАК“.

На схадзки, на хторей присуствовала и секретар НС Таня Арва Планчак,  вигласане и же би ше Саню (Полдруги) Дивлякович предложело за Награду „Искри култури“ за сучасну творчосц младому авторови по 35 роки живота, хтору додзелює Заводу за културу Войводини.