Приєм при предсидательови Одбору за образованє Народней скупштини

Odbor

Представительох Координациї Националних совитох (НС-ох) националних меншинох 11. октобра у Народней скупштини Републики Сербиї приял предсидатель Одбору за образованє, науку, технолоґийни розвой и информатичне дружтво Муамер Зукорлич, а бешедоване о образованю на язикох меншинох, насампредз о Заключеньох хтори Координация НС-ох принєсла на своєй схадзки у Новим Пазаре у юлию того року, як и о витворйованю правох на образованє на мацеринским язику.
У делеґациї були представителька словацкей националней меншини Светлана Золнян, мадярскей Анико Єрас, горватскей Дарко Сарич Лукендич, ромскей Витомир Михайлович и рускей Мелания Римар, предсидательока Одбору за образованє нашого НС, а на схадзки присуствовали и народни посланїки Томислав Жиґманов, Фатмир Хасани, Либушка Лакатош и Олена Папуґа (истрочашнє є и член НС Руснацох), котра и орґанизовала приєм при предсидательови скупштинского Одбору Муамерови Зукорличови. 
Як после схадзки гварела Мелания Римар, привитуюци делеґацию предсидатель Одбору Зукорлич гварел же у тим мандату национални меншини буду мац собешеднїка, же будзе на їх боку и там дзе годзен, будзе уплївовац на ришованє проблемох у образованю на язикох меншинох. За тото цо меншином заґарантоване з Уставом, муша ше вєдно, принципиєлно и арґументовано бориц национални совити.

На схадзки поведзене же проблеми, з даєднима винїмками, за шицки меншини скоро идентични. Мацерински язик ше як обовязни виборни предмет находзи у „ґрупи Ц”, вєдно з другима предметами (народна традиция, одбойка, руки у цесту...), та єдни другим конкурую, а школяр ше шме опредзелїц лєм за єден виборни предмет з тей ґрупи. Прето и на тей схадзки вимагане цо скорей пременїц статус мацеринского язика, гварела Римарова.
- Наглашене же нєобходне формовац самостойни, а нїяк комбиновани ґрупи за ученє мацеринского язика. Тиж вимагане же би ше могло формовац ґрупи гоч приявени и менєй як петнац школяре, як тераз предписане зоз Законом. За отверанє ґрупох за ученє язика з елементами националней култури будзе ше вимагац найменєй осем приявених школярох - гварела предсидателька Одбору за образованє НС Руснацох Мелания Римар, котра була у делеґациї Координациї НС-ох.