Означованє 200-рочнїци народзеня Петра Кузмяка

Петро Кузмяк

З нагоди 200-рочнїци народзеня Петра Кузмяка, 1. октобра того року будзе отримани Округли стол з тему „200 роки од народзеня Петра Кузмяка” (на 10 годзин), а домашня му будзе Основна и штредня школа з домом школярох з Руского Керестура, хтора и ноши мено свойого першого школованого учителя - утвердзене пондзелок, 12. септембра на схадзки Роботней ґрупи за орґанизованє тей подїї. Роботну ґрупу оформел Вивершни одбор Националного совиту (НС) Руснацох, а схадзка отримана у Школи „Петро Кузмяк”.
Як догварене, викладаче на Округлим столє буду др Янко Рамач, Дюра Латяк и Микола М. Цап, а будзе приказани и филм о Странянох - Кузмяковим родним месце. Презентацию Странянох и памяткох на учителя Кузмяка у тим месце пририхтую представителє Штреднєй фаховей школи з Попраду у Словацкей, на чолє з директором Васильом Кузмяком.
Пред Округлим столом будзе положене квеце на бисту Петра Кузмяка у школским дворе, а у голу отворена вистава хтору з нагоди тей значней рочнїци пририхтує домашня Школа.
На першей схадзки Роботней ґрупи присуствовали директорка Школи Хелена Пашо Павлович, предсидатель Вивершного одбору НС Желько Ковач, предсидателька Одбору за образованє НС Мелания Римар, член НС Сашо Сабадош, Микола М. Цап, та Любица Няради и Михайло Надь зоз Школи „Петро Кузмяк”.
Витворенє Округлого столу о Петрови Кузмякови резултат Спорозуменя о сотруднїцтве керестурскей и спомнутей школи з Попраду, хторе подписане 7. авґуста 2015. року у Руским Керестуре, а з поштредованьом НС Руснацох.