Кадрово пременки у Заводзе за културу ВР и РНТ

НС

Понеже директора Заводу за културу войводянских Руснацох (ВР) мр Серґея Тамаша Покраїнска влада 20. юлия поставела за помоцнїка покраїнского секретара за привреду и туризем на штиророчни период, Тамаш дал задзекованє на длужносц директора Заводу, а за окончователя длужносци (о.д.) директора Заводу за културу ВР, Национални совит (НС) Руснацох предложел Ивану Дудаш з Руского Керестура, мастер инженєра менаджменту, котра дотераз була директор Руского народного театру (РНТ) „Петро Ризнич Дядя”.
Ивана Дудаш дала задзекованє на место директора РНТ „Петро Ризнич Дядя”, а за о.д. директора нашого националного театру НС Руснацох, як снователь, меновал Таню Арва Планчак, секретара НС, котра дотераз була и член Управного одбору РНТ, так же Арва Планчакова дала задзекованє на членство у Управним одборе Театру.
Одлуки о розришеню Тамаша з места директора Заводу за културу ВР, Дудашовей з  места директора РНТ, Арва Планчаковей з членства у Управним одборе РНТ, та предкладаня за менованє окончовательох длужносцох директорох у Заводзе и РНТ принєшени на електронскей схадзки НС Руснацох, хтора отримана од стреди, 27. юлия, по 12 годзин штварток, 28. юлия. Пред електронску схадзку, стреду, 27. юлия, о тих питаньох перше бешедоване на схадзки Вивершного одбору НС.
Спомедзи 19 членох НС „за” спомнути одлуки на електронскей схадзки гласали 11 члени,, два гласи були „процив”, а шесцеро члени Совиту нє гласали.
Предкладанє же би Ивана Дудаш була менована за о.д директора Заводу за културу ВР, на законски предвидзени час, будзе послате до Покраїнского секретарияту за културу, явне информованє и одношеня з вирскима заєднїцами, хтори го предложи Покраїнскей влади на менованє, як сосновательови Заводу за културу ВР.
Понеже НС Руснацох снователь РНТ „Петро Ризнич Дядя”, одлука о менованю Танї Арва Планчак за о.д. директора РНТ (на законски предвидзени час), конєчна, а понеже є розришена з членства у Управним одборе Театру, познєйше будзе меновани нови член УО.
У мандату окончовательох длужносцох, управни одбори спомнутих двох установох розпишу конкурси за директорох.