Лєтня школа руского язика други раз у Попрадзе, у Словацкей

Попрад

Од 18. по 24. юлий у Попрадзе, у Словацкей, отримана Лєтня школя руского язика Одбору за образованє Националного совиту Руснацох. То други раз же ше Лєтню школу за наших школярох орґанизує у Попрадзе (там є отримана и прешлого року), а на нєй участвовали школяре котри закончели шесту и седму класу основней школи з Руского Керестура, Коцура, Дюрдьова, Вербасу, Кули, Нового Саду, Нового Орахова, Бачкей Тополї, Суботици, Шиду, Бачинцох и Беркасова.
На Лєтнєй школи руски язик преподавали Сенка Бенчик з Нового Орахова, односно Б. Тополї и Каролина Папуґа з Руского Керестура, историю Иван Канюх з Нового Саду, ґеоґрафию Дарко Бобаль з Бикичу, виронауку о. Владимир Еделински Миколка з Беркасова, музику Сашо Палєнкаш з Руского Керестура, а зоз школярами и наставнїками у Попрадзе були и предсидатель Вивершного одбору НС Желько Ковач и директор Заводу за културу войводянских Руснацох Серґей Тамаш.
- Орґанизованє Лєтнєй школи у Словацкей резултат подписаного Спорозуменя медзи Прешовским самоуправним крайом и АП Войводину, хторе ше одноши и на сотруднїцтво у образованю и з тим нам, як и прешлого року, штредня школа у Попрадзе безплатно обезпечела интернат за змесценє наших дзецох. Участвовали дзеци котри през школски рок були успишни у ученю, лєбо на рижних змаганьох, и то им була и свойофайтова награда. Думам же то барз добре за нашо дзеци же видзели стари край, а велїм то перши раз, як  и же спознали же ше и у других жемох бешедує по руски, же ше и зоз своїм мацеринским язиком можу згвариц поза гранїци Сербиї, а нє лєм з анґлийским. Школяре преглїбели и утвердзели знанє руского язика, а дзепоєдни котри слабше бешедую свой мацерински язик и прегварели по руски. Пейц днї дзеци препровадзели вєдно у ученю, друженю, мали зме и три едукативни вилєти - до Попраду, видзели зме историйни замок у Старей Любовнї и туристичне место Штрске Плесо на Татрох. Думам же и того року цилї Лєтнєй школи сполнєти - гварел Желько Ковач после врацаня з Попраду.

Наставну и програму пребуваня у Лєтнєй школи одобрел Одбор за образованє НС Руснацох. Костиранє, здравствене осиґуранє за дзеци, материял за роботу и други трошки зношел Одбор за образованє НС, хтори за Лєтню школу опредзелєл 250 000 динари, док превоз обезпечел Завод за културу войводянских Руснацох. Роздумує ше нашу Лєтню школу прешириц и на руски дзеци з Горватскей, односно сотрудзовац з їх Лєтню школу, та би убудуце число дзецох було звекшане, з чим ше, як гварел Ковач, домашнї у Попрадзе зложели.