У Коцуре будзе руске оддзелєнє першей класи и Дом Руснацох

Коцур

У порядней нащиви подручним канцеларийох (ПК) Националного совиту (НС) Руснацох по наших местох, представителє НС штварток, 13. мая, нащивели Подручну канцеларию НС у Коцуре.
З предсидательом Вивершного одбору НС Жельком Ковачом и секретаром Совиту Таню Арва Планчак у Коцуре бешедовали предсидатель ПК Микола Ґубаш и члени Канцелариї, медзи нїма и подпредсидатель НС Микола Шанта, а найвецей бешедоване о образованю и култури. На схадзки присуствовала и заменїк предсидателя Општини Вербас Ксения Бенце, котра и член ПК.
Кед слово о образованє по руски визначене же у Коцуре у наступним школским року будзе оформене руске оддзелєнє першей класи основней школи, бо ше уписали пецеро школяре. То витворене и дзекуюци намаганьом членох ПК, потримовки НС у ришованю того проблему, Општини Вербас и другим учашнїком у тей акциї.
З обласци култури найвецей бешедоване о Фестивалє „Коцурска жатва”, як и о Фестивалє фолклорних традицийох Войводини, хтори ше отримує у Вербаше, а на тогорочним будзе представена руска култура, у чим значну учасц буду мац Коцурци.

Тидзень пред тим, 5. мая, на схадзки Подручней канцелариї НС Руснацох бешедоване о будуцим Доме Руснацох у Коцуре. На схадзки присуствовал и предсидатель НС Славко Рац.
Предвидзене же будуци Дом Руснацох будзе у просторийох у будинку обок при Доме култури, а з його власнїком будзе подписани контракт о хаснованю на пейц роки, з припознаваньом половки уложеного пенєжу у случаю предаваня хижи, по вицеку контракту.
Було слова о етапох и способе адаптациї просторийох у хторих будзе Дом Руснацох, а за його адаптованє НС совит видвої коло 6 тисячи еври. На схадзки розпатрани можлївосци за яки роботи и материял тот пенеж будзе унапрямени, як и хтори роботи ше пороби волонтерски, а за хтори будзе потребне анґажованє професийних майстрох. Конєчна одлука о Доме Руснацох у Коцуре будзе принєшена на схадзки НС, 14. мая.