Семинар ОЕБС-у о образованю националних заєднїцох

Ечка

Мисия ОЕБС-у у Сербиї, вєдно з Министерством просвити, науки и технолоґийного розвою, Заводом за вреднованє квалитету образованя и воспитаня, Заводом за унапредзенє образованя и воспитаня и Тимом за социялне уключованє и зменшанє худобства од 25. по 27. април у Ечки  орґанизовала  семинар о образованю припаднїкох националних заєднїцох у Сербиї. На семинаре участвовали представителє националних совитох (НС) Руснацох, Мадярох, Румунох, Українцох, Словацох, Чехох, Горватох, Бунєвцох, Македонцох, Словенцох, Ромох и Єгиптянох, а спред НС Руснацох на Семинаре були членїца НС и предсидателька його Одбору за образованє Мелания Римар, и членїца Одбору за образованє Весна Раґаї-Цап.
Семинар отворела, совитнїца за питаня людских правох и нєдискриминациї у Мисиї ОЕБС-у у Сербиї Лесли Хес, котра наглашела же образованє барз важне за очуванє националного идентитету, а у тим ключни партнере национални совити, за хторих ше и надалєй будзе орґанизовац таки семинари пре унапредзенє активносцох на полю образованя на мацеринским язику.
Совитнїца у Министерстве просвити, науки и технолоґийного розвою Ясминка Перуничич-Ален бешедовала о компетентносцох и активносцох Министерства, як и о искуствох у сотруднїцтве з националнима совитами. Наглашене же ше муши змоцнїц и свидомосц директорох школох о важносци образованя на мацеринским язику, а у нєурядових розгваркох представителє меншинох припознали же у тим найвекши проблем лїха, лєбо нїяка национална свидомосц родичох.
На вецей подобних сходох представителє националних заєднїцох спозорйовали на нєришени статус мацеринского язика як школского предмету, алє тот проблем у Министерстве ище вше нє ришени. И на терашнїм семинаре у Ечки вимагане же би дзеци мали право вибрац два виборни предмети, кед єден з нїх мацерински язик, алє потолковане же пре вельку обретхованосц, школяре нє можу мац два виборни предмети. Знова поставене питанє прецо оцена з мацеринского, як виборного предмету, нє уходзи до просеку, алє на тото компетентни знова нє одвититовали.
Мисия ОЕБС-у у Сербиї уж того мешаца нащиви национални совити и основни школи дзе настава на мацеринским язику, та о образованю по руски буду бешедовац з компетентнима у Руским Керестуре.