Нащивени подручни канцелариї у Шидзе и Бикичу

Шид

Предсидатель Вивершного одбору Националного совиту (НС) Руснацох Желько Ковач и секретар НС Таня Арва Планчак 14. априла нащивели подручни канцелариї (ПК) НС у Шидзе и Бикичу.
О стану у ПК у Шидзе и з активносцами и планами КПД „Дюра Киш” за тот рок представительох НС поинформовали подпредсидателька НС и координаторка Подручней канцелариї Наташа Еделинкки Миколка, член НС Юлиян Ковач, подпредсидатель КПД „Дюра Киш” Мирон Джуджар, як и Вера Дупало и Далибор Болдиш.
Бешедоване о роботи секцийох у КПД, плану активносцох на локалних манифестацийох у општини Шид, як и о участвованю КПД на наших фестивалох од националного значеня. Тиж було слова и о образованю, информованю и службеним хаснованю руского язика у шидскей општини.
У Бикичу представительох НС о стану у ПК и КПД „Иван Котляревски” поинформовал координатор ПК и предсидатель спомнутого дружтва у тим валалє Деян Бобаль. Як гварел, и Бикичанє планую активносци у своїм валалє, як цо то манифестация „Пришли нам Русадля”, участвовац на наших фестивалох, а тиж и госцовац у иножемстве.
Бобаль наведол же би им за роботу требало обезпечиц єден компютер и народне облєчиво за танєчнїкох.