Нащива Подручней канцелариї у Орахове

Орахово

У рамикох порядних нащивох подручним канцеларийом (ПК) Националного совиту (НС) Руснацох по наших местох, предсидатель Вивершного одбору (ВО) НС Желько Ковач и секретар Совиту Таня Арва Планчак всоботу, 9. априла нащивели ПК у Новим Орахове, у КУД „Петро Кузмяк”. Спред ПК на схадзки присутвовали координаторка Канцелариї Татяна Дудаш, та члени Михайло Еделински, Владимир и Борис Маґочово и Сенка Бенчик.
Бешедуюци о култури, предсидатель КУД „Петро Кузмяк” Михайло Еделински винєсол тогорочни план роботи Дружтва, односно його секцийох. Як гварел, тераз ше пририхтую за смотри на уровню општин, як и за означованє 70-рочнїци доселєня Руснацох до Нового Орахова и 200-рочнїци народзеня Петра Кузмяка. Ораховчанє и того року наступя на шицких руских фестивалох, а планую и наступи у иножемстве.
О стану у образованю и информованю у бачкотопольскей општини присутних поинформовала Сенка Бенчик, котра гварела же и у тим школским року виборна настава по руски орґанизована у двох ґрупох у двох основних школох у општини, а вєдно облапени 35-еро школяре. Школяре активно нащивюю годзини, рихтаю ше и участвую на змаганьох, а и того школского року, у орґанизациї  Дружтва за руски язик, литературу и културу,  отримане стретнуце з нашима писателями.
Кед слово о информованю, нови власнїк Явного информативного подприємства „Тополя” зоз занятима за емисиї по руски и словацки нє предлужел контракт, та ше на тим локалним радию и телевизиї од децембра прешлого року емитує лєм репризи емисийох на тих язикох.
З предсидательом ВО НС Жельком Ковачом порадзене же ше пре проблем у информованю на руским язику, як и пре финасованє ораховского Дружтва, будзе вимагац приєм при предсидательови Општини Бачка Тополя Ґаборови Кишлиндерови.