Централна преслава нашого швета нарок 14. януара

Централна

У Општини Шид 6. априла отримана инициялна схадзка представительох руских институцийох з представителями локалней самоуправи о орґанизациї Централней преслави националного швета Руснацох 2017. року у Бикичу, на хторей порадзене же централна манифестация означованя швета будза 14. янура. Вистава малюнкох, етно-вистава, промоция моноґрафиї и Служба Божа буду отримани у Бикичу, а Шветочна академия, потим и коктел, у Културно-образовним центре у Шидзе.
Як гварел предсидатель Општини Никола Васич, будзе подписани Протокол о сотруднїцтве медзи локалну самоуправу, Месну заєднїцу Бикич и Заводом за културу войводянских Руснацох, як ношительом орґанизациї Централней преслави националного швета, у хторим буду начишлєни обовязки подписнїкох.
Тиж порадзене же спред локалней самоуправи особа за контакт задлужена за питаня орґанизациї преслави будзе началнїк Општинскей управи Шид Ромко Папуґа, котри тиж присуствовал на схадзки.
У делеґациї Руснацох були подпредсидательлка Националного совиту (НС) Руснацох и координаторка Подручней канцелариї НС у Шидзе Наташа Еделински Миколка, предсидатель Вивершного одбору НС Желько Ковач, директор Заводу за културу войводянских Руснацох Серґей Тамаш, предсидатель Совиту Месней заєднїци Бикич и координатор Подручней канцелариї НС у Бикичу Деян Бобаль, парох у Беркасове и Бикичу о. Владимир Еделински Миколка и Янко Гнатко и Весна Данчелович.