Националному совиту з републичного буджету 9,2 милиони динари

БҐД

За финансованє роботи националних совитох националних меншинох у Сербиї у тим року з буджету Републики видвоєни 245 милиони динари, виявела 12. фебруара, после схадзки з представителями националних совитох (НС) националних меншинох, директорка Канцелариї за людски и меншински права Сузана Паунович.
За роботу НС Руснацох з републичного буджету опредзелєни 9 милиони 200 000 динари, цо за 100 000 дин. менєй як влонї, кед то було 9,3 милиони динари. У мено НС Руснацох на схадзки у Беоґрадзе присуствовал його предсидатель Славко Рац.
Найвецей средства достаню совити найчисленших националних меншинох у Сербиї - мадярского 61 милион, бошняцкого 26,6 и ромского 22,1 милион динари. НС Словацох достанє 18,4 милиони, Румунох 13,3; Албанцох 13,1, а НС Горватох 13 милиони динари. НС-ти Болгарох и Чарногорцох у 2016. року достаню по 7,7; Влахох 7,5, а НС-ти Бунєвцох и Македонцох по 7 милиони динари. НС Українцох достанє 4,6 милиони динари, Нємцох и Словенцох по 4,1; Чехох 4, Єгиптянох 3,7; Ашкалийох и Грекох по 3,6, а Союз єврейских општинох Сербиї достанє 3,8 милиони динари.