У Кули отримана Централна шветочносц означованя националного швета Руснацох у Сербиї

Дзевяте означованє 17. януара, националного швету Руснацох у Сербиї, односно його Централна шветочносц того року орґанизована и отримана у Кули, всоботу, 16. януара.
Програма Централней шветочносци почала дополадня з турниром у шаху у просторийох Руского КУД „Др Гавриїл Костельник”, з нагоди швета видрукована и окремна моноґрафия „Зоз живота Руснацох у Кули”, хтора пополадню представена у Школи за основне музичне образованє, а пред Благодарну Архиєрейску Службу Божу, у просторийох грекокатолїцкей парохиї у Кули орґанизована вистава иконох о. Йосафата Гардия зоз Словениї, походзеньом и з Кули.
Руснаци з Кули на Централней шветочносци орґанизовали и два подобово вистави своїх согражданкох - академскей малярки Лидия Барна и малярки-аматерки Амалиї Ковач; госцом и домашнїм були предложени и стародавни єдла на етно-столу, а як и на дотерашнїх, коруна централней преслави нашого швета була Шветочна академия, хтора отримана у Велькей сали Културного центру Кула. Цала програма закончена зоз заєднїцким коктелом за госцох, учашнїкох и домашнїх у просторийох Мадярского културного центру „Непкер”.
Шицки програми, окреме вечарши, були барз добре нащивени и присуствовали на нїх Руснаци зоз скоро шицких местох у Сербиї, Руснаци з Горватскей и зоз Словацкей, представителє державних и покраїнских орґанох, Општини Кула и локалних самоуправох дзе жию Руснаци, представителє других националних заєднїцох, члени Националного совиту Руснацох, його одборох и подручних канцеларийох, священїки нашого Апостолского еґзархату, та руководителє и представителє наших найзначнєйших установох, институцийох и здруженьох.
На Шветочней академиї з нагоди националного швета Руснацох у Кули всоботу, 16. януара окреме привитани ґенерални секретар предсидателя Републики Сербиї Неделько Теньович, заменїк предсидателя Општини Кула Велибор Милоїчич, подпредсидатель Покраїнскей влади Мирослав Васин, помоцнїк покраїнского секретара за образованє, предписаня, управу и национални заєднїци-меншини Янош Орос, предсидатель Националного совиту Руснацох и покраїнски посланїк Славко Рац, народни посланїци у Народней скупштини Олена Папуґа и др Лїляна Бероня, монсиньор Янош Блаховяк - одправнїк роботох Апостолскей нунциятури у Сербиї и апостолски еґзарх за грекокатолїкох у Сербиї владика Георгий Джуджар.
Тиж привитани и директор за културу Войводянских Руснацох мр Серґей Тамаш, директорка НВУ „Руске слово” Мартица Тамаш, одвичательни редактор новинох „Руске слово” др Борис Варґа, та одвичательни редакторе рубрикох на руским язику РТВ Златица Няради и Мирко Канюх. На Акедемиї присуствовали и предсидателька Скупштини општини Кула Снежана Мркаич, директорки наших школох - керстурскей  „Петро Кузмяк” Хелана Пашо Павлович и коцурскей „Братство єдинство” Славица Байор, представителє КУД „Осиф Костельник” з Вуковару як госци кулского РКУД, а телеграми винчованки за швето послали предсидатель Скупштини АП Войводини Иштван Пастор и амбасадор України у Сербиї Олександер Александрович. 
На сцени Културного центру, дзе за тоту нагоду обдумана и пририхтана окремна сценоґрафия, автора мр Дарка Вуковича, професора дизайну на новосадскей Академиї уметносцох, по привитно-винчуюцих словох визначних госцох, на Шветочней академиї виведзени добре повиберани и окреме квалитетно и успишно интерпретовани шпивацки, музични и рецитаторска точка, а попри домашнїх з Руского КУД, хторе того року означує и 20-рочнїцу роботи, акцент бул дати и на професийних музичарох з Кули - походзеньом и Руснацох.
Шицки манифестациї Централней шветочносци у Кули орґанизовали, пририхтали  и помогли Завод за културу войводянских Руснацох (хтори и главни финансиєр Шветочносци), Орґанизацийни одбор за Централну шветочносц, Општина Кула, Руске КУД „Др Гавриїл Костельник”, кулска Подручна канцелария Националного совиту Руснацох, Школа за основне музичне образованє Кула, Културни центер Кула и Културно-просвитна заєднїца Општини Кула.
Вецей информациї и фотоґрафиї з програмох Централней шветочносци означованя националного швета Руснацох мож опатриц на правим боку того сайту.