Националне швето означене и у подручних канцеларийох

Националне швето Руснацох и того року означене у подручних канцеларийох (ПК) Националного совиту (НС), так же од 15. по 18. януар у ПК, односно у културно-уметнїцких (просвитних) дружтвох отримани пригодни програми и коктели за госцох, на хторих предкладани и нашо традицийни єдла. На преславох у ПК присуствовали и дзепоєдни чолнїки, лєбо представителє локалней самоуправи, як и руководителє и члени Националного совиту Руснацох и його фахових целох.
Националне швето 15. януара означене у Суботици, Шидзе и Коцуре; 16. януара у Вербаше, а на сам дзень швета, 17. януара, пригодни шветочносци отримани у Дюрдьове, Ґосподїнцох, Новим Орахове и Бикичу, дзе националне швето заєднїцки означели ПК з Бикичу и Сримскей Митровици. У Руским Керестуре националне швето Руснацох означене 18. януара.
Вецей информациї и фотоґрафиї о означованю швета по наших местох мож опатриц на правим боку того сайту.