Вивершни одбор пририхтал дньови шор за схадзку Националного совиту

ВО

У Заводзе за културу войводянских Руснацох штварток, 20. новембра, отримана 5. порядна схадзка Вивершного одбору Националного Совиту (ВО НС) Руснацох, на хторей присуствовали предсидатель ВО Желько Ковач и члени  Наташа Макаї Мудрох, Микола Шанта, Йовґен Мудри, та секретар НС Таня Арва Планчак.
На дньовим шоре були вецей точки - як предкладаня дньового шору за наиходзацу схадзку НС-у, так же Совиту на розпатранє и прилапйпованє буду предложени План роботи и Финансийни план Совиту за 2016. рок, вименки финансийного плану роботи Заводу за културу войводянских Руснацох за тот и План роботи Заводу за идуци рок, предкладаня членох до управних и надпатраюцих одборох Заводу и РНТ „Петро Ризнич Дядя” и єдного члена до УО НВУ „Руске слово”.
На схадзки бешедоване и о додзельованю припознаньох визначним Руснацом за їх доприношенє рускому народу, за цо потребне утвердзиц критериюми.
Було слова и о Националней стратеґиї и Акцийним плану, та предложене же би ше зволало округли стол и на нїм утвердзело напрямки и позитивни интенциї за актуализованє реализациї уж принєшеней Стратегиї концом 2012. року, та видзиц цо поробене, а цо остало реализовац.
На схадзки предложене и же би ше зняло компакт-диск з рисованима филмами за дзеци, прейґ хторих би ше учели по руски.
Плановане же шлїдуюца схадзка НС Руснацох будзе отримана 5. децембра.