Средства за проєкти по конкурсу Роботного цела за младеж НС

На другей порядней схадзки Роботного цела за младеж Националного совиту Руснацох, хтора отримана пияток, 12. юния у Вербаше, розподзелєни средства за проєкти хтори сцигли на конкурс Роботного цела. До конца мая, на конкурс за софинансованє проєктох за младих сцигли 16 проєкти, з чого єден прешлїдзени Одбору за образованє, а шицким другим одобрени средства. Роботне цело за 15 проєкти мало на розполаганю 230 000 динари.
Найвецей - 50 000 динари, одобрене Туристичному здруженю Руски Керестур за орґанизованє Медзинародного волонтерского кампу у Руским Керестуре.
За Мултимедиялну манифестацию младих ”Дньовка” Здруженя младих ”Пакт Рутенорум” з Руского Керестура одобрени 35 000 динари.
Здруженє гражданох ”Еко Ґерила” достанє 23 000 динари за проєкт садзеня, отримованя и преширйованя желєних поверхносцох у Новим Орахове.
За проєкт „Акция 2015”, чий ношитель Коцурске здруженє младих, опредзелєни 15 000 динари.
За проєкт ”Нарисуй свой швет” КПД ”Карпати” з Вербасу достанє 13 000 динари.
За Циклус креативних роботньох КУД ”Тарас Шевченко” з Дюрдьова достанє 12 000 динари.
По 10 000 динари достаню КУД ”Тарас Шевченко” з Дюрдьова за проєкти ”Гаваї парти” и ”Пижама парти”; Форум младих Рускей матки з Нового Саду за ”Бал под масками”; КПД ”Карпати” з Вербасу за проєкт ”Цо упишеш?” и Туристичне здруженє Руски Керестур за проєкт ”Млади спорту”.
По 8 000 динари достаню Руски културни центер з Нового Саду за проєкти ”Дзе(нь) младосц(и) и ”Литерариюм”,  Дружтво Руснацох у Суботици за проєкт ”Витайце у нас” и КПД ”Дюра Киш” зоз Шиду за проєкт ”Вечар сучасней рускей музики”. 
Проєкт „Пестованє руского язика и култури” Дружтва за руски язик, литературу и културу Роботне цело за младеж прешлїдзело Одбору за образованє Националного совиту.