Отримана преширена схадзка Вивершного одбору НС

З преширеней схадзки Вивершного одбору НС

У Заводзе за културу войводянских Руснацох у Новим Садзе штварток, 7. мая отримана друга порядна схадзка Вивершного одбору Националного совиту (ВО НС) Руснацох, на хторей, попри членох ВО и його предсидателя Желька Ковача, присуствовал и предсидатель НС Славко Рац, як и предсидателє Одбору за образованє, Одбору за културу и Одбору за информованє и службене хаснованє язика и писма НС - Мелания Римар, Ґабриєла Саянкович, Иван Сабадош и Зоран Бережни.
Бешедоване о акцийох хтори треба порушац пре звекшанє числа школярох у руских оддзелєнох у наших местох, як ришиц проблем финансованя нашого професийного Театру, о недостатку фаховцох за роботу з аматерами у наших дружтвох, як и о других актуалних проблемох вязаних за нашу заєднїцу, а хтори у компетенциї НС.
Кед слово о терашнєй приватизациї локалних медийох дзе постої и информативна програма на руским язику, заключене же гоч вони буду приватизовани, НС муши и будзе инсистовац на дотерашнєй програмней шеми.
На ВО заключене и же ше подручни канцелариї Националного совиту муша баржей активовац, як и же потребне змоцнїц сотруднїцтво з другима националнима совитами.
О спомнутих, та и других проблемох з хторима ше зочує наша, алє и други национални заєднїци, будзе бешеди на роботней схадзки Координациї националних совитох, хтора 9. и 10. мая будзе у Ковачици, так же на тей схадзки ВО присуствовали и члени НС, лєбо його одборох, котри буду участвовац у роботи Координациї.
На схадзки Координациї националних совитох у Републики Сербиї, спред НС Руснацох буду присуствовац заменїк предсидателя Совиту Йовґен Мудри, член НС Мирослав Кевежди, член Одбору за службене хаснованє язика и писма Деян Загорянски, а єден дзень и членїца НС и предсидателька його Одбору за образованє Мелания Римар.