Представителє НС о виучованю руского язика у Бикичу

Школа у Бикичу

У Подручним оддзелєню Основней школи „Сримски фронт” у Бикичу стреду, 6. мая отримана схадзка представительох Националного совиту (НС) Руснацох з родичами о виучованю руского язика у тей школи.
О значносци виучованя руского язика з елементами националней култури з родичами бешедовали подпредсидателька НС Наташа Еделински Миколка, предсидателька Одбору за образованє Мелания Римар, предсидатель Вивершного одбору  НС Желько Ковач, як и предсидатель Подручней канцелариї НС у Бикичу Деян Бобаль и наставнїца Златка Сивч Здравич.
Тераз пецеро школяре ходзи на годзини руского язика, а наздаванє же их од септембра будзе дзешецеро.
Порадзене и же подобна схадзка з родичами будзе отримана и на початку нового школского рока, як и же би ше прейґ медийох популаризовало виучованє руского язика у Сриме.