Держава и национални совити на истим задатку

З конститутивней схадзки Совиту за национални меншини Влади РС

Под предшеданьом подпредсидательки Влади и министерки державней управи и локалней самоуправи др Кори Удовички, штварток, 29. априла у Беоґрадзе отримана конститутивна схадзка Совиту за национални меншини Влади Републики Сербиї. Як сообщене з Министерства державней управи и локалней самоуправи, подпредсидателька Влади Кори Удовички, котра источашнє и подпредсидателька Совиту за национални меншини, наглашела же Сербия нєшка з гордосцу може визначиц же представя мултиетнїчну заєднїцу у хторей жию коло 30 национални заєднїци, хторим, з почитованьом найвисших медзинародних стандардох, з Уставом заґарантовани меншински права. На конститутивней схадзки Совиту за национални меншини на уровню держави  присуствовал и предсидатель Националного совиту Руснацох Славко Рац.
- Рижни национални меншини, з матичну державу, лєбо без нєй, розличней велькосци и розличних специфичносцох, уживаю право на власни идентитет и културну самоуправу - гварела Удовички.
По єй словох, Сербия нєшка гордо може повесц же превозишла найвекши виволаня зложеного нашлїдства мултиетнїчних конфликтох и же нєшка почина процес превозиходзеня дотерашнєй нєефикасней, нєдїлотворней политики спрам припаднїкох националних меншинох. Вона додала же Совит, хтори ше зиходзи после шейсцох рокох, зроби шицко же би обезпечел защиту правох и интересох хтори дружтво препознало як окремни - одлучни тримац процес звонка дньовей политики, лєбо мандату єдней Влади.
- Тот процес подрозумює пременку одношеня держави спрам националних меншинох, алє и пременку одношеня представительох националних меншинох спрам держави. Вон подрозумює запровадзованє диялоґу з ясно поставенима рамиками - подполне уважованє держави Сербиї з подполним уважованьом културней автономиї и идентитету припаднїкох националних меншинох - гварела подпредсидателька Влади Удовички.

На схадзки заключене же у маю-юнию буду отримани роботни схадзки ресорних министрох - членох Совиту на уровню держави, з националнима совитами националних меншинох. Теми и план схадзкох предложи новооснована Координация националних совитох националних меншинох, у сотруднїцтве з Канцеларию Влади за людски и меншински права, гвари ше у сообщеню.
Попри Кори Удовички, на схадзки присуствовали министер просвити, науки и технолоґийного розвою др Срдян Вербич, министер култури и информованя Иван Тасовац, державни секретар у Министерстве вонкашнїх дїлох Велько Одалович, державни секретар у Министерстве державней управи и локалней самоуправи мр Иван Бошняк, як и представителє 20 националних совитох и Союзу єврейских општинох Сербиї.