Кулска општина потрима програми за националне швето Руснацох

Зоз схадзки у Кабинету предсидательки СО Кула

Кулска општина потрима Централну преславу означованя Националного швета Руснацох, у януаре 2016. року - гварене вовторок, 28. априла на розгварки представительох наших институцийох з чолнїками Општини Кула, отриманей у Кабинету предсидательки Скупштини општини Кула Снежани Мркаич.
Познате же по розпорядку отримованя централних програмох з нагоди 17. януара (хтори прилапел Национални совит Руснацох), шветочносц нарок плановане отримац у Кули, так же вовторкове стретнуце було инициялне за снованє Орґанизацийного одбору преслави у Кули, як и за доставанє технїчно-лоґистичней и другей потримовки од Општини Кула за єй орґанизованє. О тим з предсидательку Скупштини Општини Кула Снежану Мркаич, заменїком предсидателя Општини Кула Велибором Милоїчичом, началнїком Општинскей управи Велибором Савковичом и шефом Одборнїцкей ґрупи Сербскей напредней странки у кулскей СО Перицом Видеканїчом бешедовали предсидатель Вивершного одбору Националного совиту Руснацох Желько Ковач, директор Заводу за културу войводянских Руснацох Серґей Тамаш и предсидатель Руского КУД „Др Гавриїл Костельник” у Кули Владимир Бучко. 
Директор Заводу за културу ВР Серґей Тамаш домашнїх поблїжей упознал з дотерашнїма програмами Централного означованя нашого швета и сотруднїцтвом з локалнима самоуправами у єй орґанизованю, як єдней з важнєйших програмних, орґанизацийних и финансийних активносцох Заводу. Як гварел заменїк предсидателя Општини Кула Велибор Милоїчич - и кулска локална самоуправа будзе добри домашнї, з тим вецей же є приклад барз добрих медзинационалних одношеньох, же у тей општини жиє найвекше число Руснацох у нашей жеми, а Општина финансує и роботу єдиного Дому култури Руснацох, як установи, у Керестуре, тиж и КУД „Др Гавриїл Костельник” у Кули. Будзе то и афимация Руснацох, як у городзе Кули, так и у општини, а догварене же з предсидательом Општини Кула Драґаном Трифуновичом директор нашого Заводу подпише и окремни меморандум о техничним сотруднїцтве и потримовки же би ше, як поведзене, у буджету Општини могло плановац и одредзени потребни средства за тоту намену.

У будуцим Орґанизацийним одборе за Централну преславу националного швета Руснацох у Кули буду и представителє локалней самоуправи, а вовторок такой догварене же єден з нїх будзе директор Културного центру Кула Каменко Бертич, дзе шветочносц будзе и отримана. Попри сали и других просторох Културного центру, на розполаганю будзе и його Ґалерия, а после розгварки з чолнїками Општини, Ковач, Тамаш и Бучко нащивели и Културни центер, дзе о спомнутим бешедовали з директором Бертичом.
Вовторок порадзене же початком мая будзе конституованє Орґанизацийного одбору за преславу у Кули, а начално порадзене же Централна преслава нарок будзе 16. януара.