У новим законє дефиновац и статус националних совитох

Йовґен Мудри

У орґанизациї Проєкту „Меншински висти” вовторок, 28. априла у Беоґрадзе отримани округли стол о „Ключних виволаньох националних совитох националних меншинох у Сербиї од 2015. по 2020. рок”. У мено Националного совиту (НС) на тим сходзе присуствовал заменїк предсидателя Совиту Йовґен Мудри.
Як у своїм звиту з того збуваня преноши Мудри, визначене же кед ше принєшени закони нє запровадзує, односно нєт нїяки санкциї за їх нєзапровадзованє, вец вони лєм декларациї, о чим, як и о пременкох и дополнєньох Закона о националних совитох бешедовал заменїк Координациї националних совитох у Сербиї Есад Джуджо. Вон ше заложел за цо лєпши будуци закон, применлїви од верховней по локалну власц, а за помоц у його вирабяню поволал и цивилни сектор. Джуджо бешедовал и о отвераню поглавйох 23 и 24 у процесу предприступних прегваркох з ЕУ, а наглашел и же потребне дефиновац статус националних совитох меншинох бо су, як гварел, тераз дефиновани як „нєдержавни цела меншинских управох”.
Свойо думанє о терашнїм Законє о националних совитох у контексту оценьованя дзепоєдних його членох як нєуставних на округлим столє винєсол и народни посланїк Риза Халими, котри на становиску же попри приношеня нового Закону, потребне принєсц и нови Устав Републики Сербиї.
О искуствох и на прикладзе роботи Националного совиту Румунох, насампредз у поглядзе його деполитизованя, на округлим столє бешедовал Марчел Драґан, закладаюци ше за цо менши уплїв политики у националних совитох, односно же би вони були значнєйши як системи културней автономиї.
Попри представительох националних совитох меншинох у Сербиї, на округлим столє присуствовали и представителє Министерства за державну управу и локалну самоуправу и Канцелариї за людски и меншински права Влади Републики Сербиї.