РУСКИ КЕРЕСТУР – Представнїки Министерства за людски и меншински права, вчера, 22. януара нащивели просториї Националного совиту у Руским Керестуре и два фамелиї з валалу.
У урядовей нащиви пребували помоцнїк министра за людски и меншински права Стефан Срблянович, совитнїца у кабинету министра Єлена Црнобрня, предсидатель Националного совиту рускей националней меншини (НСР) Стеван Самочета, предсидатель Вивершного одбору НСР Славиша Сабадош, член НСР и предсидатель Рускей матки проф. др Михайло Фейса и секретар Месней заєднїци Михайло Пашо.
Срблянович схадзку зоз представнїками НСР з тей нагоди оценєл як барз конструктивну и визначел же найвецей бешеди було о тим на яки способ треба ище вецей унапредзиц роботу Националного совиту же би мал цо лєпше сотруднїцтво зоз другима Републичнима орґанами. Вон додал и тото же представнїки Министерства обишли и два руски фамелиї, зоз цильом же би ше цо лєпше упознали зоз проблемами и виволанями, як и же би ше тоти проблеми цо скорей ришели.
На схадзки бешедоване и о финансованю и планох Националного совиту у 2026. року, о важних конкурсох и проєктох на хтори ше планує конкуровац, як и о тим же би ше ознова порушало Радио „Руски Керестурˮ.
The post Представнїки Министерства за людски и меншински права нащивели Керестур first appeared on Руске слово.