НОВИ САД – На вчерайшей схадзки Одбору за службене хаснованє язика и писма отриманей у Заводзе за културу войводянских Руснацох конституоване нове зволанє, вибрани заменїк предсидателя Одбору и принєшени План роботи за 2026. рок.
Схадзку зволал и водзел предсидатель Одбору проф. др Михайло Фейса, а преволани нови члени з чим почало важиц и їх формалне членство. Попри предсидателя, нови члени и проф. др Юлиян Рамач и проф. Мария Сакач зоз Коцура, мр Гелена Медєши зоз Руменки, мaст Зинаида Будински и Анита Ґовля зоз Нового Саду и проф. др Светлана Стойков зоз Суботици. За заменїка предсидателя Одбору вибрани проф. др Юлиян Рамач.
На схадзки присуствовал и предсидатель Националного совиту Руснацох Стеван Самочета и пожадал успишну роботу, а потим ше проф. др Фейса огляднул на роботу скорейшого зволаня. Попри тим, членох Одбору упознал и зоз своїм анґажованьом од хвильки кед є меновани на тото место по схадзку, а потим представел План роботи у дванац точкох за 2026. рок.
Окремну часц схадзки пошвецел огляднуцу на предходну Националну стратеґию Руснацох и поволал на формованє новей, та уж предложел вименки хтори ше одноша на обласц дїлованя Одбору за службене хаснованє язика и писма.
То перши одбор хтори формовани после задзекованя предходного зволаня у авґусту того року.
The post Конституоване нове зволанє Одбору за службене хаснованє язика и писма first appeared on Руске слово.