Конституовани Одбор за образованє Националного совиту

КОЦУР − У просторийох Основней школи „Братство єдинство” у Коцуре всоботу пополадню, 25. марца, отримана Конститутивна схадзка Одбору за образованє Националного совиту (НС) Руснацох.

Зоз схадзку предшедовала предсидателька Одбору за образованє Олена Папуґа, а попри пейцох, од дзевец членох Одбору, присутни були и предсидатель НС Руснацох Йоаким Рац, предсидатель Вивершного одбору НС Руснацох Желько Ковач и секретар Совиту Таня Арва Планчак. Тиж, схадзки присуствовали и други члени НС Руснацох зоз Коцура, як и Тим за превенцию осипованя школярох Основней школи „Братство єдинство”.

Перша часц схадзки одношела ше на формованє Одбору за образованє у тим зволаню Националного совиту. Одбор за образованє конституовани, творя го дзевец члени, и то Наталия Будински, Любица Няради и Даниєла Сопка зоз Руского Керестура, Єлена Кухар зоз Дюрдьова, Ана Мария Рац зоз Нового Саду, Наташа Еделински Миколка зоз Шиду и Сенка Мученски и Славица Чельовски зоз Коцура. По словох предсидательки Одбору Олени Папуґа, вибрани таки состав же би цале нашо образованє у рижних формох було заступене у тим Одборе.

Тиж, у конститутивней часци схадзки вибрана и заменїца предсидательки Одбору за образованє НС Руснацох, то будзе Ана Мария Рац.

Друга часц схадзки була пошвецена нашому образованю, односно розправяло ше о проблему зоз уписованьом школярох до першей класи руского оддзелєня у Коцуре. Понеже ше зявел проблем у тим месце, як визначене, шицки присутни члени Одбору у преширеним составе активно участвовали у дискусиї и давали свойо предклади за його ришованє. През длугшу розгварку шицких присутних, винєшени велї проблеми у образованю и формовани дальши крочаї.

Одбор за образованє, як и на вецей заводи визначене, будзе мац вельо роботи у наиходзацим периоду, алє вшелїяк же до ришованя того проблему будзе мушиц буц активно уключени нє лєм Национални совит, алє цала наша заєднїца.

The post Конституовани Одбор за образованє Националного совиту first appeared on Руске слово.